nang: PL Sergio Gramonte Calayag
Mikit-ikit deng poeta, keting simpling pamitipun
At gagale lang poesia, tatalakad balang metung
Matula lang makirandam, keng mesabing pamipulung
Itang tula ampon saya, iyang tutung susun-susun
Kabang ilang midudungut, babalangkas dening planu
Makananung pasulungan, kapampangan tang amanu.
Dakal problemang arapan, nang solusyon gawan tamu?
Ila rening mipangutang, at babie da ing.palino
Mengalto la rening grupu, megsariling lang aguman
Papaskil de ketang dalig, nanu la reng piyamanuan
At neng misan mayayakit, at lulto ya ing katasan
‘lang bisang magpakumbaba, ila kanu deng mabeluan
Panugali ning poeta, iya ining pakasurian
Ala kaya ing katasan, ala mu ring kayabangan
Tutung e no uumisan, bagkus ila reng sasaupan
Lalu na nung migkamali, itang mali ‘yang samasan
At ing poetang mabeluan, amanu na pakasurian
Amanu na maglipato, ketang banua ing sukdulan
E magpatilo keng matas, at masakit kabagsakan
E makanian ing poeta, pairalan ing kababan
Nung manakit kong poeta, pagmayabang kayang beluan
Iyang metung a poetang, tutung dimut keng kabiasnan
Itang beluan nang dadalan, at tutu nang paniwalan
Ini ibat king Dios lbpa, at kaya na mu peparam
January 18, 2022.
