nang: PL Sergio Gramonte Calayag
Ining metung a poeta, malikut ya kaisipan
Tune ini iyang lulub, nung nanu-nanu’ng dadalan
Tutung atin nang kayapan at atin mu rin karokan
Itang mali ampon ustu kayabe ing kabanalan
Potang ini iyang datang kalikutan niting isip
Agyang dayat yang malualas darasan ne ing sumangid
Tune ini yang lalagpus agyang pader ing paligid
Pati bulan babo banua, darasnan neng alang rocket
Kareng tau ketang dalan, o ninuman ing dadalan
Keng likut na niting isip alako ne ing imalan
Itang gerra karin Ukraine at ing gerra karin Viet Nam
Iya ining mamilatan, maliari nang apatuknang
Agyang iyang tiktak bayat, gumapang yang elepante
Iya ining pagapangan ketang kilub ning kisame
Pati kuting na ning pusa iyang gawang metung tigre
Iyang munta America, talete ya keng alambre
Arapan da ing katutuan, gamitan ing kaisipan
Gawan sana ining mayap at ing marok iyang lisyan
Kasipagan iyang gawan, e na kabud paninapan
Gamitan ya’ng kekang isip, ban masenso keng kabiayan.
Tune la ring istoriador deng poeta niting lipi
Sasalesen at susulat, ing panaung maliliari
Ilang metung kayamanan, kening lahi tang komanggi
Tune no mang manyiliksik, panuyatan dang parati
Ban kanita e do kailian, gagale ne ing mensahi
Iparas ne kareng tau, itang ustu’t alang mali
Uling pantas yang lalawan, e ya metung maglilili
Ipalino rening aral, ban tandanan dang parati
