Macuiad A Poesia
Irvin Harvey Rivera
Siuala Ning Maliwalu/Anac Ning Baculud
March 15, 2018
Misna ia cataram ing canacung dila
Ania, mimingat cu qng pamagsalita
E cu pala balu at e cu mo saria
Dacal nala pala ring e na matula.
Istung balang ume nacung mamanapse
Mimingat cung tambing at pacacalale
Pacatalustusan co pang masalese
Ding balang amanung guingcas cu’t daraque.
E cu bisang maguing anti mo qng asan,
Maralas qng asbuc a paneng apanan
Ania, baiu que pa qng asbuc sambitlan
Pacaisipan que pang macatapilan.
Isa, adua, atlu, gunamgunaman cu,
Mataram ia’ing dila, pacaisipan mu
Mimingat cang pane, guiquingcas Amanu
E ca bisubisu, pane cang mamrenu.
Pota cabud datang, bigla iang taluras,
Mataram a dila, bigla iang malisuas
Pota aguingcas na at nu’ ia miparas
‘Nia managuanta ca at miamasamas.
Nung atin cang dimdam at micacunu ca
Ala nang muna pa qng pamanaguanta,
Cauatan me’ing dila qng pamanapse na,
Qng maling Balita’t macapaniugat ia.