( Tula / Poema )
nang Jose Roman Reyes Laquian
Quing maleparan aplaya / ning beluan , balang dusuldit /
Anti cung malating anac / a capara ning bulilit /
Cabang macasalicut ya / quening canacung panaquit /
Ing degulan ning catutuan / quing dayatmalat mamaplit . /
Ding carutungan o maguing / ding marangle na niting bie /
Dusuldit cong babalican / at lalacaran cong pane /
At queng cacung pamanlacad / mapayapa at manene /
Miraraque la canacu / quing cabaluan dang dalise . /
Dusuldit que babo yatu , / canacung aumasdan ya /
Ing capanayan quing Bayung / Calalangan ibat banua , /
At , dusuldit macayama / ya’ing penandit cung painaua /
Quing pamagdulap cung saya / cambe yatad nang ligaya . /
Dusuldit queng malucang bie / cu ya ing cacung abatas /
Daca’lang taung daratang , / at , antimurin , lalabas ; /
Daca’la ring mangi-saque , / at , mapenandit , cuculdas , /
Atin maluat maqui-abe’t / atin ma’intun bayung gasgas . /
Dusuldit cung macatabnung / matapat a caluguran /
Que lele cu e mamaco / quing oras-capagsubucan , /
Maintinding cayabaian , / cayabe-ng manalacaran , /
Macayabut palad aguiang / man miragsa cung mapilan . /