nang: PL Sergio Gramonte Calayag
Panabilin nang ingkung ku, iyang metung ortelanu
Potang aku ing mamangan, e managan agyang nanu
Kabutil nasi keng pinggan, iya ining gisanan ku
Pablasang bie keng asikan kasakitan yang akit mu
Magumpisa keng sarulan, itang pali pibabatan
Mamaswe at mamaranun, kayabe ne ing tatanam
Kabuklat na ning masala keang tenam sisilawan,
Lalawan na nanu’ng kulang, lalarinan ing kasiran
Potang iyang mekabili, pamangading alang tuknang
Kayaduanan king Dios lbpa, ing kasiran yang alisyan
Ketang uran ampon bagyu, ketang pali ning sikluban
Inya iyang manigapu, king Guinu Dios tang Miglalang
Nung ala nang ortelano mananaman king asikan
Dumanup ya ining tau, tutung ala yang apangan
Maging sira ne matulid ining tau a danupan
Ketang danup nang dadalan, mabating ya katuliran
‘nia balang butil ning nasi iya sanang pakamalan
Uling iyang meging bunga, ketang keang kapagalan
Kasakitan dadalanan ortelano keng asikan
Iyang dinan sang ulaga ban ing pagal e masayang