(metung ya pu ini karing poesia ku keng lalam ning pamansag a “talubang: panalala keka tang”. metung ya pung koleksiun da ring eleya a sinulat ku, at daragdagan ku pa para keng kanakung tata)
king kekang pamamun, kakapkap ku dulum,
kakapkap ku dulum makabang panaun,
makabang panaun king lumbe mekulung,
king lumbe mekulung king kekang pamamun.
matua naku ngeni dapot anak ku pa,
lakuas deng aldo mu, istung ayan ku la,
neng pasialan ku la reng aldo kanita
a makaternu kung tuki mung sisimba;
ampo pa neng misan, istung keng obra yu,
neng manaring obra at mabengi kayu,
tuki ku keng obra uling ing buri ku
pane rakang abe… -atiu ku siping mu.
ngening ing panusig e kuna tatakman,
kikiak ya ing anak kening pilubluban
e na na kalupa ketang milabasan
a ing kekang lugud pane na kung aruan.
melumo ku yata king lugud mu kaku
a kakung pantunan king pamaglako mu;
kukutang ku dati obat likuan mu ku,
ngara, minta naka karin banua kanu.
sinawa naka ‘ta king kasias ku buntuk?
o sinawa nakang kanaku lulugud?
aku, ali ku pa sinawa king lugud
a bibie mu ketang e ka pa metudtud.
pero nanu pa man, salamat maragul
uling meragul kung king ustu mituntun,
e sayang ing oras a kekang dinaun
ban ku mung mabiasang duku king Menyaklung.
9/20/17
kabang mamalis kuartu keng iskuela