Neng Al Pedroche
Alas seis ning bengi
Masàquit isipan
Yng paintungulan
Ning quecatamung bie
e’tamu aintindian.
Baquit ‘ta melalang
Para mu queluatan,
Maguacas mu yng bie
At matè tamu ngan?
Oba’t queni yatu
Ating casaquitan,
Sana panè tùla,
Ala’ng calungcutan?
Ania’ng anac cu pa
Yan yng cacung cutang,
Ania bilus ning Dios,
Mala-guintung beluan.
Yng bie na ning tau
Anti ya’mong libru’ng,
Alang macasulat
Nanu mang amanu.
Yng tùla at lungcut
Itamu’yng susulat,
Pati cabaldugan
Ning bie queni’ng aclat.