King bunduc alaya malam cang misapuac,
at ing kecang daya ya ing keke’ng lamac,
king Dios Mayupaya ing bie mung busilac
a pigcalub mu ya keke’ng kecang anac.
Ica ing keke’ng bie king sariling labuad,
keti ke magsale cambe ring capatad,
keti ke mabibie, keti ke miyanad,
king leguan mung tagle, layun mamucadcad.
Dacal nong casalang a keca sinubuc,
dacal nang dinatang, mabayat pagsubuc,
cambe ning Miglalang, ike’ng makipamuc
bang e re asintang ing tibuan mung bunduc.
Indu ming ibatan, icang mal kecami,
Ica ing lingapan, manggang mabie cami.
E. P. D.