( Independence Day)
Anyang sumakup ya ing bangsang Espanya,
ayba!…kaluat pala! …atlung dalan banua,
at dening Kastila agpang king istorya,
milalu la asta balamu ninu la.
Pablasang minuna ing beluan tá dimut,
pékiapusan tamu aské rá’t pangimut,
at ngeni masdan yú sobra tá ayabut,
ding amanu tamu pilming maki samut.
Kékaba ning banuang keti lá peynawa,
atna tá karakal tikyan á sistema,
at king pamanyupil úwá taná mung wá,
nuné na makanyan tuki keng buri da.
Médismaya ku mû kening adiskubri,
oba’t bangsa tamu ikwa rang binandi,
ketang America pisali de iti ,
“20 million dollars” aluk á pisabi.
Bayu lá pá dintang ding Amerikanu,
ating pámágalsa kening bangsa tamu,
ínya é melaus king binye rang presyu,
kétang bayaran dé’ing kekatang gubyernu.
Méluat ing panaun karela migsilbi,
balamu é ustu …milalu no reti,
ínya ding guerilla linwal no’t sinigi,
ala’nang marapat …linaba’nó reni.
Migtagumpe lamó king mesabing gulu,
king tagle nang tapang Andres Bonifacio,
king panaung ayta Presidenti kanu,
pero ing likluk da’y Punung Aguinaldo.
Inyang téngalan dé king Kawit Cavite,
at ding sablang tau karin mémagbunyi,
karin de wesiwas bandera ning lipi,
Eytin naynti eyt..ning Hunyo a dosi.
Manibat kanita menasa metula,
uli napi’nitang ume táng melaya,
anti tamóng ayup sinyuk king katula,
king kandadung awla biglang mekawala.
Meka ulagpus man karing memanyupil,
king mapilang banua mika pamibungil,
ing taung milukluk mataram ya pangil,
pepatomba nala ring keyang kapagkil.
Balamu mo wari ganap ‘tang milaya ?
ali !…uli da reng midinan upaya,
meging sakim nala’t gewa ra nang gewa,
king batas tuntunan lalabag lang sarya !
Dapot nung kalayan íyang paninasan,
masanting ta’ng batas dapat ílang tukian,
íng bie katimauan agyu yang parasan,
nung ding balang metung misaup saupan!
Sinulat neng ;
Patria Bondoc David
(Tsokolating Lagu-lagu)
Cuidad ning Angeles
10 ning Junyo 2016
