Lorung Malabit
*
Awa, ustu naka, mali naku naman,
ala naman bayu, parating makanian.
Ing lugud ku keka gagawan mung punan,
yaku ing susuklab, anggiang pang kapilan.
**
Maratna ka kanuan, e ka biasang dukû,
uling balu mu nang yaku rin sumukū.
Ustu ka o mali, yaku ing parugū,
ban e na kumaba, yaku ring manarū.
***
Pagkalungkutan kung apalumo ra ka,
uling e ku buring lumulam ka lupa.
Dapat ding sagu mu pinutut ku na la,
kanitang tutugun at makuyad la pa.
****
Ngeni makaba na, pelalung taid mu,
lakuas kang mesubi king pamanabusu.
E ku na balu pa nung nanung daptan ku,
ban agising da ka ampong apagbayu.
*****
Sana mibalik ya, ing kanitang ika,
itang tutung ikang, kaku migpasinta.
Mibalik ya sana, nung nu ya man minta,
uling ining ngeni, e ke kakilala.
Rodel E. Gozum
11 Junio 2023
San Simon