SEVEN (7) EUCHARlSTIC RULES OF LIFE
Pitung tuntunan ning bie Yukaristia
nang: PL Sergio Gramonte Calayag
1) Bring your life to Jesus.
Ing pakakamalang bie, kang Hesus idala
Kening Santa Misa, keni makiabe ka
Ing kekang sarili, idaun me Kaya
Akua me’ng ulaga, at ing kalamnan na
Iya sanang basan, Ebanghelyo nang Juan
Kabanatang anam, tutu nang amanuan
Katawan na’t daya, tune yang pamangan
Ini ing simbitla, king tauling apunan.
2) Be present to JESUS.
Keni Santa Misa, iyang tutung atsu
Saka makirandam, gigkas nang amanu
Nung katawan atsu, isipan alayu
E me papansingan, mayupayang Guinu
Katawan mu’t diwa, idaun me Kaya
Keting ka-orasan, kening Santa Misa
Susulapo isip, o mamialungan ka
Ala ing presensiya, tune mebating ya
3) Thank Jesus’ for what you have.
Ining Yukaristia, amanung salamat
King tauling apunan, ngeni ne tinatag
Metung a regalo, a tutung atanggap
Tune yang pamangan, keng bie tang masampat
E ka pasalamat, ika ing mikabus?
Kareng grasyang tinggap, ikit mung mamagus
Ing bie mung masikan, at grasyang mibulus
Iyang pigpa keka, ban e makalunus.
4) Ask boldly for yourself and for others
Dakal kakulangan, a tutung kailangan
Kening pamibie-bie, sabian mung masikan
Ilang anyawaran detang kayaduanan
King oras ning misa, deni itas mo ngan
E mo kakalinguan, detang mangailangan
Ilang ipanyawad, king Guinung miglalang
Aliwa mu’ng keka, ila reng pakiduang
Pati reng aliwa, ilang rampulayan.
5) Ask forgiveness and forgive
Aduan mu rin Kaya, ing kapatawaran
Gewang kasalanan ampon kakulangan
Ing pamikasala, ilang kekang sisian
Keni Santa Misa, keni idaun mo ngan
Kaibat mong adaun, ika’ng mamatawad
Kareng mikasala’t, e ginawang mayap
Keka lang pangadi, matsura dang dapat
Ban ilang magbayu, at mikabieng ganap
6) Offer your sufferings to Jesus.
Idaun la mu rin, dening kasakitan
Ing sakit at bayat a kekang dadalan
Ba’mung panandaman, tune kapaldanan
Kening Santa Misa, ilang ibie mu ngan
Kalupa nang Abel, iniang yang migdaun
Ing pekamasanting, ini yang dinaun
Arap ning Dios lbpa, keni ka dadalung
Iyampang mu Kaya, mikabieng maratun
7) Seek Jesus’ heroic will for you.
Parating itanam, kening kaisipan
Ing lugud ning Guinu, keti king sikluban
Saka pigunaman, kayang kasakitan
Dusa at pasakit, a tutung denasan
Kayang kabayanyan, iya sanang akit
King krus ya mipaku, tune megkasakit
Sakit nang delanan, iyang memalipit
Ba’mung aligtasan, ing bie mung mapait
Anya pigunaman, kening Santa Misa
Mayupayang Guinu, keni manenaya
Iyang pakisabian, at sumuyu kaya
Lugud a dalise, keni akamtan la.
Ila sang ikabit kening kaisipan
Potang ika’ng simba, ing Dios pakisabian
Ining kekang isip, e ya lipang-lipang
Tune nang presensiya, akit king pisamban.
(Aral nong Fr. Manny Flores, National Chaplain ning ANF, ketang seminar ding Adoracion Nocturna Filipina, Diocese of Tarlac council, iniang Setiembre 14, 2019, lele Tarlac cathedral)
