nang: PL Sergio Gramonte Calayag
Kabud iyang ikit, babo ning lamesa
Ining metung plumang tutung mayulaga
Tune magamitan ning metung poeta
Taung talagambul keni nang kultura
Tutu nong melangi milako la tinta
Deng dakal poetang gagamit keng pluma
Ila reng linele, saka selikut pa
Inia yang metamle’ng malagung kultura
Ing Literatura keni nang balayan
Tutu yang metamle anti yang tanaman
Ala nang sesese, e na gagambulan
Kulang ya keng dilig, kulang kalingapan
Ninu reng susulat keng kasalesayan
Historiador reni, kipmuan king kagiwan
Poeta la mu rin tune lalarawan
Leguan niting lugal tutung pagkarinan
Iya nang damputan ing plumang milele
Ngeni yang gamitan kanita e tamle
Malagung kultura pasibayu yang mie
Atsu king gamat yu, itang abe-abe
Ngana ning poeta, neng susulat kudta
Agad nang isulat buri nang pawaga
Kanita e mako, mabura, mawala
Iyang manatili, keng isip at diwa
Poesiang asulat, ila reng tipunan
Datang ing panaun ilang kayamanan
Anti la mung bakas ila reng tuntunan
Ketang pangasulat e la makalinguan
Inia ining pluma, tutung mayulaga
Atsu ketang gamat ning metung poeta
Kudta nang asulat, pakamalan na la
Ibat la keng pusu, itang kalamnan da