Mala-soneto
Lorung Malabit
*
Anggang kapilan ku pa kaya aguantan,
ing daramdaman kung kaku manalipan?
Anggang kapilan ku pa agyung panpanan,
ing gugulu kaku angga king pagkeran?
**
Ing pasampiong suglap, makagyu na kaya?
King mayumung sunis e ku isambitla?
Ing pamiyabe tang sinese makaba,
masira wari nung kekang aulata?
***
Nung arakap mu la ring panakong lawe,
mangilag ka kaya at e na makiabe?
Buri ku na sanang keka isaglawe
a kanaku mal ka at katuglung ning bie.
****
Dapot ing liim na ning pusu ku sinta
alage ku pamu potang mabalu ka.
Rodel E. Gozum
24 Junio 2023
San Simon