nang: PL Sergio Gramonte Calayag
Ing malagung Filipina, atin leguan a dadala
Manibat keng panugali, at lugud na keng pamilya
Ala kaya’ng kapabustan, kalingapan ing mumuna
Kipmuan ya king kabanalan anti ya mong mabie santa
Ing timan nang misnang yumu, mayumu pa keng panilan
Balang tau a manakit, ila reni deng abitan
Anti yang batu-balani, iyang kipmuan king sikanan
Tutung e me man asagka, anting danum king danuman
Nung iya ing pakilimpi, kareng lahi ding dayuwan
Ing leguan na aliwa ya anting diamante a makinang
Salikut man ketang baul, ing brilyu na yang mangalual
Anti aldo babo banua e asagka ning ninuman
Ing dalagang Filipina malugud yang parang tau
Magailangan lilingapan anting Melchora Aquino
Magsilbi yang alang bayad e manaya agyang nanu
Ipalkas ne’ng kayang lugud, iyang tutung damdaman mu
Itang lugud manibatan at mituru king pamilya
Anti gaindu ketang pugad, kalingapan ing mumuna
Lukuban no rening sibung, ketang lalam ning salu na
Parandam na itang paling manibatan keng pusu na
Pablasang metung uliran, uliran king kabanalan
‘yang maliari nang pamana, keng pamilyang pakamalan
Iyang metung a kristiano, bitbit na ing kapanwalan
Keng Mayupayang Guinung Dios ‘yang parating sasandalan.
(Dakal a salamat kang Ligaya (Leydi) Sibal Bulaun)