nang: PL Sergio Gramonte Calayag
Manibat iniang ing celfone tutung ini yang miyusu
Dakal kareni nang tau ilang tutung mengaloku
Ini metung kagamitan, ketang mayap ampon ustu
Ing makamal a pamilya, iya mu ring meyabusu
Kareng anak a magaral mebobo la keng ispeling
Itang awus a jejemon, iyang tutung e masanting
Katuruanan ketang ustu e mituru ‘guiang katiting
Tinuki la ketang agus, ing kabiasnan yang mebating
Atin naman a mensahi, migtext ya ing asawa
Managkat yang mikawani, saka iyang mamalmura
Problema e agyung dalan, iyang magpakamate na
Dinatang ya ing kaduang, tune me “wrong send” ya pala
Atin ring mekipag-text mate, ining lalaking asawa
Iya ing mekipaglolo , kening celfone nang dadala
Iniang ilang mikaburi, karin SM mikit na la
Ketang lugal ning carousel iyang lugal tipanan da
Kabud petsa iyang miras at mikit na ilang adua
Keni nang mesabing lugal, e bisa mang maniwala
Kayakit keng ka-text mate na, mepipi ya at mebigla
Ining ikit keng arapan ing malagu nang asawa
Atin naman a mamusit, iya kanu’ng tinud lotto
Ining kaya nang numero, menyambut mumunang premyo
Iniang iyang munta bangko, alang tiran agyang singko
Megastus ya at mepagal tune iya ing meloko
Ining masakit pang biru ilang atsu king ospital
Ila rening medisgrsya, at ing load yang kailangan
Sasabian pa ing alaga, saka iya ing padalan
Ing text yang pamagloko, metung taung mapanlinlang
Atin naman tutung awus, ing kasaupan yang kailangan
Ila rening mipanawus, keng problemang dadalanan
Ketang agad nang pakibat, iyang agad ayagapan
Pauli na niting celfone ketang ustung kagamitan
Dapot ngeni mibayu na, dening celfone ‘tin camera
Dening tau a magloko, akakit de ing itsura
At megawa ya ing batas, deng numeru rehistru la
Ketang gawang pamagloko ‘tin katulid a parusa