( Julio 16, 1990)
nang: PL Sergio Gramonte Calayag
Atlung pulu’t atlung banua ing panaung milabasan
Mika-ayun a masikan, iyang tutung penandaman
Atsu kami kaduang pisu keng escuelang pituruanan
Mitakutan la reng anak kabud iyang arandaman
Sinabi ku kareng anak, meko keni lumual tamu
Mitalanan kayung gamat, ikalmanti sarili yu
Tinipa kami keng eran, miras kami ketang patiu
Tatagan yu ing sarili, mangadi tamung rosaryu
Kabang ikaming mangadi, titigtig ya ing kumpana
Ketang sikan nitang ayun, ginalo ya, yang dili na
Gagalo ya rin ing gabun, anting alun ing galo na
Darandaman iyang bubiung, dening anak mangaga la
Ing escuelang pituruanan, ketang dutung ya megawa
Keng kayang pangatalakad, anting anak teterak na
Maglangitngit ing pisuglung , panenayan yang mitomba
Dapot mesubuk ya tibe, ketang tibeng ‘lang kapara
Dakal mangalgal keng takut keting ayun misnang sikan
Malilyu na keng panandam ketang galong e tutuknang
Inia ikeng memanuli, linawe ya ing karinan
Pasalamat king Dios lbpa ing sakuna aligtasan.
Pangabukas yang balita kareng tv at keng diyaryo
Itang hotel na ning Hyatt mayakit ya karin Baguio
Iya ini ing mitomba, at dakal lang mete tao
Escuela Nueva Ecija, melasak yang akakit mo
Salamat kang Sir Robby P Tantingco ning CKS Holy Angel University