Deni pu reng piesang buu la silaba reng rima ra. “nan” nung “nan” la at e la mu kabud “an”. atin mong metung a misamut uling sunis a sakdal ing pegrima ku o retang rimang tikduang silaba gagamitan a rima.
Dudurut ya ing kuentu keng kalokuan na ning persona, at lugud na kang Mona angga keng kasal la.
“ing kagpa megin yang karangkal“
ing pamaniaklu ku ‘ti pikubiang-kubiang,
ing pamikatagun, ngaku ban e sayang;
panakawanan keng lawe ining Celiang,
ing keyang sisinup uling ‘neng kayangiang.
indang atiu lele, asne pala sama,
ngana pang meniunu, “e me buring ‘tima?”
uling e ke balu, ngaku keya, “ima,
akua ke mu pu ‘yan, diluan ke pu uma.”
kaibat kung mekibat, biglang mipalawe
keng kakung kasabing mikasbu na lawe,
mengasanipan ku, deig ke pa ing melue,
ngana, “keng mamala biasa ka tung kawe?”
pikpuk nakung timba, misapa ku gabun.
kayatna ku, atiu keng tulid ing balbun.
05/17/20 /17:30
kaibat megbusig
“angin“
ing bulan Nobiembri mayangin yang bulan,
bulan ning burarul, bulan ning kalísan,
malbe ku pang atbung keng trak da lululan;
keng bariu mi ita ing kanakung disan.
kaparang anak ke kanita i Mona
king kekaming bariu karin Mining kan’ta:
mediu e maingat itang pangalo na
dapot ing pusu ku ‘yang gale na’t kanta.
misan kayabe ke king bulan mayangin,
atin kung burarul at iya man atin;
anting balu na ku isipan ning angin,
biniru ne niti paldang mala-satin.
sangkan la mong tùla reng mata kung bural,
ginut na kung Pedrung miguniat king kural.
07/07/21 /12:44
kabang mamangan keng mr. frosty
“e meka-isa“
taka-takiki ku keng gulut gareta,
kabang pauli tang menibat keng lauta;
napus bengi kasing keka migbisita,
igkat da kung tuki ri koya mu’t tata:
ana la katoto deng addua mung bitis;
keng aldo ana ka kayaslag a kutis;
kabang deng mata ku, warit mangilatis,
king pagugumasdang e malanging batis.
papasaken mu ku ken king gareta sa’
lumakad nakumu, ngaku, e ku bisa;
at iniad ku nemu ing tapis mung katsa,
sangkan pigtibukbuk ban kung maka-isa.
dapot abasa mu ing kakung isipan,
sera mo reng puad mu ban ing batis takpan.
05/18/20 /13:43
kabang miminum diboti
“alang asusungkit“
istung mepitna ne ing bulan ning Mayu,
atin palosebu karin keng tulid yu,
kilala ra ka ngan keng kekatang bariu,
banua banua ikang manikua keng premiu.
neng akakit ku la retang mangga keta,
agaganaka ku iniang anak kata,
e wari reta pa retang manggang deta
reng agaran bungang malulut kanita?
at neng detang mangga meningga nong ikit,
sangkan dakang agkat ban katang maniungkit,
makapalda ka man, mukiat alang sakit,
sangkan ku kanitang talan-talan sungkit.
alben daka babo, pasimpling titiman,
at e ku manikua aggiang metung mu man.
05/19/20 /23:42
kaibat megminindal bengi
“masalang banua“
keng kanakung ukul e ku aggiung buran,
ing ketang anak kung mine rang tiburan,
kabang lalakad ku, o’t biglang minuran,
layun migsalilung, petilan ing uran.
pamagsalilung mu ing kabud kung nasa
keng sulip ning bale ban e ku mabasa
mipatalanga ku, at pisig ing basa,
ikit ke i mona at ing keyang pusa.
king lande ning bale sesilungan pala
king siwang, ding mata anting memiesta la
uling sinoro yang alang pangabala
ing masalang banua a meningit sala.
ing keyang kaputul, tinipa yang saktu
ikit na ku’t bilio, berongga nang batu.
07/03/21 /08:36
kaibat migalmusal
“pota galang“
misan misapa ku keng pisasakluanan
uli nining Celia a penakawanan
at limiran lawe itang kayamanan
keng pilatan nang puad a baggia pimpanan.
abalu nang Mona, asne kamua kaku,
at mikal ya daya uli ning gewa ku;
iniang kukutnan ke o’t mua ya kanaku,
mekibat ya, “basta”, “nanung basta?” ngaku….
ing pagtakan ku mu o ba’t mibabua ya
kening kalokuan kung depatan kang Celia,
mas mikaluku ya kesa ketang iya
itang pilan besis binante ku saya.
melikut ku ukul a pota ing kamua
uling lalawe kung babaing aliwa….
07’16/23 /’17:37
kaibat mengan sneaker
“king mabasa nang baru“
ketang malati ku e ku akatulan
ing istung mumuran ing lumual keng dalan,
e anti reng aluang mamialung tagalan,
iniang memaintau kan’ta mialilan.
sadia, neng mumuran piwung e ke akit
i Monang diamanti king kakung panakit,
pantunan ke leguan, tabalu nung bakit
anti kung salunan, anting atin sakit.
pero e na ngeni… lulual na kung seria
keng lalam ning banuang mangagang masaya,
agkat keng mamialung i Mona kung mutia
agkat keng tagalan, at aku ing taya.
anggang e titila, keta keng pigulut,
keya, reng mata ku e mu la alutlut.
07/07/21 /00:29
kabang lalarinan ing mepakling salamin-mata
“uling aulata mu“
misdan naku keka anak tamu pamu,
keka ing isip ku pane yang kakatmu,
paninapan pane ing lupa mung mamu,
at isipan daka bayu pa manimu.
masaya kung pane abe raka kan’ta,
at susopan daka aggiang nu ka munta,
abe rakang pialung aggiang nanu ita;
aggiang ing kalokuan e ku ayaguanta.
pero misan aldo asna ku kalumbe
uling ikit dakang atin aluang abe,
inia litlut daka’t king pialung inabe
“luksung babi tamu,” ngaku, “keta bebe.”
pero ing takde ku, keng tampa ‘ne baya
uling apansin mung akung pane taya.
05/20/20 /10:01
bayu maglutung gatang gule
“iskuter“
ketang anak tamu, ketang iskuter ku
asna ka kaburing payangkas kanaku,
maragul ya kasi parugang ing kaku
-ing ating makanian, kabud mu pin aku.
inia makanian yang mayan papulayan,
asne kasalusu baggia me mu kayan,
aggiang keng mabasa, mulayi yang mayan,
aggiang ing mabatu aggiu nang pulayan.
potang ‘yangkas daka ampong ume ta na,
ngaku mong maningat, “tatalan ka, Mona.”
pero ing mamialung keng ukul tagana
-mangakusug kata keng mabatu sana.
neng mangakusug ka asna ka kaburi
-ing kekang kalawat iyang kakung buri.
06/06/23 //20:53
kaibat meniable
“aggiang e ku biasang kawe“
ketang anak ta pa’, ing atatandanan
detang balbas atbu buri tong kakanan;
mamialung kusugan, siliman, autanan,
ampo ketang sapa mandilu tang agnan.
neng kusugan tapa tumpukan ing taya,
ninu man manyambut piwu yang masaya,
dala no keng junkshop, kang apung Curdafia,
at kaibat deng abli pilming paningaya.
neng misan, keng sapa, karin ta mandilu,
lakuas neng e tamu masipag maniaklu,
potang papunta na, mikit ing saglulu,
ing sangkan ning kakung tula e mu balu.
potang mandilu na, magtaka ka kaku
e ku biasang kawe pero sisisid ku.
05/19/20 /22:07
bayu mangan suman bulagta
“deng mata kung singkit“
deng barkada tamu neng mamanikan la
agad da ka pa mong itake karela,
uling bala nanu kekang kakilala:
sasala ing uran, ikang e sasala.
ika ing maralas pangara keng lakad
inia ikang pane ing paunan mekad,
uling kabud la mu masanting talakad
pero teksas la mung e biasang sisikad.
kabang aku naman makikituki ku,
potang manik ta na mumuna ka kaku,
pero misan bengi mibua ka kanaku,
deup mu ku lupa, pero bakit? ngaku
deng mata ku pala e mo seriang ikit
keng lalam mung palda lakuas lang sisingkit.
05/18/20 /20:09
bayu mangan ispageti