nang: PL Sergio Gramonte Calayag
Kasakit na pala, ing maging sundalus
At ne king kabayat, kupyang dadalan ku
At ne pang kapali, yang panandaman ku
Sasakit ku buntuk, bayat a dala ku
Museo Angeles aku’ng mipalabas
Deng kupyang sundalus kaku lang amalas
Sibukan isulud nung mula kabayat
Maybug kung makeling kening kayang bayat
Kupya yang USAFFE, minuna kung dimput
Kaibat keng linawe kaku yang sinulud
Kakung penandaman, ing miyalung lungkut
Dening meki-gerra, bie ra yang metakmus
Iyang aganaka, gerrang milabasan
Magiting sundalus karin king Bataan
Karelang paglualu ing balen tang tibuan
Laban kareng sakang bisang manalipan
Bista man mabayat, iyang pibabatan
Kareng mamaping balas, gamit yang kambilan
Ini e lalako, ban iyang alisyan
Itang kamatayan busal ning labanan
Maluat nang panaun iya nang milabas
Ikua itang aral tutung ababakas
Ala man manyambut, tutu mung amalas
Purus mung kasiran, melakuan a bakas