Cum laude, Bachelor of Fine Arts major in Visual Communication (TSU)
nang: PL Sergio Gramonte Calayag
Mayap la pa retang bulung ilang atin nang gempanan
Keti nang naturalesa at keng yatung pakamalan
Dapot dening dakal tau, pemateng ‘lang kasangkanan
Dakal la reng inosenti, ila rening mengasintang
Nukarin ya ing justicia? karening metampalasan
Meging maklak, pipi’t bulag, e akakit ing katutuan
“Mabuti pang mga dahon, nalaglag nang may dahilan”
Patungkul ya ining obra, metung karening lelangan
Iyang peka-anak dili, at tutu reng kilalanan
Ketang libru a melimbag, “Matenakan Kapampangan”
Adua kareng kayang lalang, meyakit ya ing gelingan
Ining anak na ning Porac, mekilala yang mabeluan
Tarlac State University pepalkas kayang beluan
Ketang kayang magaral, Cum laude yang tatangalan
Valedictory speech na, selita keng kapampangan
Tune e ne pikarine, ining amanu tang menan
Arapan ding Tarlaqueño, keti Tarlac Lalawigan
Pegmaragul ing amanu, keng arap da reng keraklan
King “India Sanskriti Ke Rang” meyakit ing keang beluan
Ing medalya at merito ila rening keya dinuang
NHED 2023 ‘yang finalist dang tengalan
Iyang “spot painting contest”;ining keang pikiabayan
Lauren Jascha Tolentino, iyang metung a uliran
A dapat dang pakiapusan keti labuad kapampangan
King TSU Karin Tarlac tuturu ne ing “Kulitan”
Kareng anak a magaral ban midagdag ya ing beluan
Mayakit keng panugali bibitbitan ing kababan
Makasadiang mangituru kareni nang kayanakan
E manayang kabayaran, pamagsilbi yang ayampang
Keti labuad kapampangan, iyang tune kayamanan
