nang: PL Sergio Gramonte Calayag
Alalan, alalan, alilan lang mamuntukan
Mangatamad, mangalaram, dagdag mo pa reng batugan
Kabud mipuk keng tungkulan, alang batas a ayampang
Tutu lang makasarili, babante la ketang kabang
Makarine, makarine, makarine ing gagawan
Prinsipyong da yang mebating, tune ini yang pebustan
Keng daratang a panaun, kamarinayan pupulan
Proyekto o ordinansa, tutung alang balung sabian
Manintun ka, manintun ka, manintun kang kayalili
Detang taung ‘tin kagiwan, ilang tune nang magsilbi
Malasakit yang papabal, alimbawa ing sarili
Pablasang ‘yang matenakan, manimuna yang parati
Deng mabeluan, deng mabeluan, e ko makitalamitam?
Keng panyulung niting balen, kabiasnan yu e ayampang?
Talino yung bibitbitan, e yu sana kikimkiman
Idake yu keti balen, ban masenso ining tibuan
Panaun na, panaun na, mamili tang manungkulan
E ko sana papaisilo, kareng pera a kikinang
Tanggapan man itang pera, at saka ka mamigunam
E masenso keng makanian, keting mali dang paralan
Talakad ka! Talakad ka! O sinta kung pakamalan
Dening bisang manimuna, ila sana deng sanakan
Itamu rening memalen, bosis tamu niting tibuan
Alalan ya ing paralan, ban mamiling manungkulan