e ku la aintindian dening kakung mata
istung miyayabe at magsolu kata
anti ketang piesta king barriu kanita,
singkit lang mata ku king oras a ita.
kabang ing katutuan, bural lang mata ku,
anti kang menakit kulayu kanaku,
pero neng ing oras keka ya at kaku
obat sisingkit lang anting makaloku?
kening kanakung lub ing pane kung nasa
kilub ning aldo’ldo kayabe raka sa’,
uling neng e raka akakit bitasa
anti kung kibkuban lumbe at paliasa.
saddia, buri rakang akit ban paglokuan;
dapot obat ngeni mimin ku kalokuan?
08/04/23 //10:04
kaibat mengan sagin
***kayabe ya pu ini ketang koleksiun kung poesia ating rimang mabilug silaba.
***arinan ku neng working title a “i mona at aku”
***15 nala reng piesa a agawa ku, at ing talindo ku anggang manga 50 o 60 piesa ban yang mabilug o mabuu ing kuentu