ing milabasan ta, kaku namung kalian,
itang neng mamialung piku, at pulayan,
ampong pane katang magbale-balayan,
bulung kata pinggan ampong gugulayan.
keng bale-balayan, atin kung ugali
bayu ta miabe, maglolo ko sagli,
at kaibat kunuaring magin tanang tali
bilang miyasawa king sintang mapali.
ngeni, milabas na itang sablang ita,
miari na ing pialung a pisuluanan ta,
bista man king bulung ning kangkung kanita,
king angga man ngeni misusulu kata.
ngeni, tutu nala reng pinggang ‘yapag mu,
kekami reng anak, keng lamesa tamu.
07/19/23 //01:57
kaibat minum ditak a kape ban mipatudtud
***kayabe ya pu ini ketang koleksiun “i Mona at aku”