nang:. PL Sergio Gramonte Calayag
Kabud iyang abalitan ing mewala ka inawa
Ing mibulus ya kanaku anting danum a marimla
Meging pisak itang sabla, panimanman ku yang mitda
Tutung aku’ng mabubungsul, alang tuknang kakung gaga
Kanita ku pin asabi, ing bakit? bakit ika pa?
Sana aku , aku na mu, aku sana ing kinua na .
Tatangis kung misnang pait, kening lumbeng panandaman
E ku agyu mang aminan, memun ka, O pakamalan
Ing salu kung maybug maspak, panandaman ing beyatan
Kabayat na, o anak ko, ing kanakung pupusanan
Anting banua a misuklub keti babo ning sikluban
Kaganaka mo, anak ku, lubus dakang kaluguran
Kening salu yang midapuk, panandaman ing beyatan
Kabayat na, O Guinu ku, ining kakung pupusanan
Inia aku ing lalapit, kening keka nang arapan
Saupan muku, O kakung Dios, kaku sanang alagpusan
Ing pagsubuk mung pigkalub, metung yang krus kung pusanan
Kabang aku ing manangis keng beyatan kung dadalan
Mipalawe ketang altar, itang krus yang apansingan
Makapaku ya ing Guinu, gagaga yang indu nang mal
Ing kanakung panandaman meyampat yang kakung dimdam
Pablasang ing lndu nang mal, pibatan na’ng kasakitan
Manibat ‘niang kabuktut ya atsu ya king sepupunan
Kasakitan yang pibata, angga na ketang kutkutan
Aku ngeni ing mimasmas saka aku’ng memigunam
Ing lndu kung Birhen Maria kasakitan nang delanan
Bugtung Anak makapase makakera keng kandungan
Alang patugut panuman marimlang bangke kakaulan
Mabubungsul keng pagsalbat dapot iyang pibabatan
Anti ku mong makirame kening kayang kasakitan
“Ing tangis nang Bernadette”
March 30, 2023
