- Neng ORLY MANALO DIZON
Sucad: labing aduang silaba (6/6);
Orthograpiang: C-K (ca,ke,ki,co,cu);
Aug 6, 2014
1
Sabi tamung Mana ya ing kegisingan
Ampo ya’ng keragul king bale carinan,
At kecaban ning bie e ke’ti kelinguan
King angga man ngeni a casalungsungan.
2
Dapot itang ngeni maliliari rugû
Dacal lang salitang daiuan a gugupû,
At meki-agum pa ding magsilbing paindû
Da reng sibabale e da ne tuturû.
3
Ing Amanung Sisuan cacung pakiuangis
King metung a gamit a birianan labis,
Pecasinup ya’ti layun pecabigkis
King ban e mabating ‘tang mal nang kilatis.
4
Pero tutu niti ing bigu nang calmâ
King panga-lele na silbi na meualâ,
Uling king sinupan na’ ti malulumâ
Ing mal nang kilatis minta ya king alâ.
5
Macanian ya naman ing Sabi tang Menan
E dapat sayangnan ing keang casilbian,
Dapat iyang gagcas king pamitipunan
King ban deng alisu deting cayanacan.
6
Caring matenacan maticding Poeta
Ibie ing masabal king Amanung Mana,
Ilage ya’t tasan gulis kecong pluma
Bersu caring lira’t linyang pacarima.
7
E gagauan itang cabud na tahimic
At paburen rugung king lele mipilpil,
Ban kegisnan Sabi ticas na magbalic
Ing gambulan, sesen keca macarikil.
8
O INDUNG SALITA nasa cu’t paninap
Ita nang idaun cailangan mung lingap,
Sesen, pacamalan ing pusu calangcap
King ban mabitasa tagimpan mung manglap.
August 6, 2023; DIZLAG Farm, Resthouse & Resort.