Neng ORLY MANALO DIZON;
Sucad: 6/6(12); Orthografiang: C-K (ca,ke,ki,co,cu)
1
Maibug ne tagana iting mamitamit
Ing salitang mana e na’ti magamit,
King pamilaguma iya sang dusuldit
Yapse ampong gagcas king balang penandit
2
King keang cabilian ya na ing ginagad
Migcusang abalu ing gulis nang palad,
Ampo ning angganan kea macasucad
Ban mirenan lunas ing kea mitacad.
3
King agus ning danum no deti tinubud
Detang keang lira king alun pepanyud,
Mengangapilpil la ampong mibulabud
A manayang caul at mapaling lugud.
4
King angin na noman deti pepasitsit
Ban miras lang agad saguling penandit,
Caring magmasabal at magmalasakit
Ban ding salita na ba dong pangulait.
5
Inia naman sana bilang Capampangan
Ing Amanung Sisuan e paglibe daiuan,
Nu ca man misanglad nanu man balayan
King dila igagcas ing sabing kegisnan.
6
Caring talaturu na niting Amanu
A pane guguniat ding mialiuang grupu,
Itang pamagaral dalasan ing ucdu
Na ning talamitan ban linang yang ustu.
7
Detang matenacan corderung poeta
Agcatan da cayung ‘gulis kecong pluma,
Pane mamicudtang malagung poesia
A maging istilu, alino at marca.
8
Ing pami-ugnayan ning metung mu bosis
Yang puntong maula at gauang macunlis,
Da ding sablang grupu ing mibigkis-bigkis
BAN MISAN PANG DATANG ticas na’t kilatis.
August 26, 2023; DIZLAG Farm, Resthouse & Resort.