Ume ca queni, Poeta, sumulat ca tang Poema,
itang masanting a pacsa, itang manayun a tema,
balang bersu at sunis da, macasucad, macarima,
bang deting talapamasa acua ra sanang mayama.
Ume ca queni, Poeta, ing pluma mu gamitan me,
queni misanmetung ca ta, ing pluma cu gamitan que,
icang tumigtig qñg lira, itang sunis paramdam te,
acung tigtig qñg gitara, angga na qñg damdaman de.
Idaque tang mitmung lugud ing cagiuan mipagcalub,
ing binie ning Dios malugud, idaun tang laus qñg lub,
uling icatang mitubud, qñg isip ta ya ing palub,
isulat ta ing macatud, ipasiag tang sican a lub.
Misip ca tang bage bage, detang bage a matimias,
antimo ing sampat ning bie malyari teng icalatas,
angga na qñg apupus te ing buri tang ibalangcas,
detang amanung dalise mecad maglacuan lang bacas.
Lauen ta ing malilyari, quening bie casalungsungan,
subucan ta ing manyuri, itang ustu yang bitasan,
detang mapanyirang puri, ilang sucat tang labanan,
salangsangan tong masiri, careng mali rang panyaptan.
Quilalanan ta la naman detang taung sablang mayap,
detang mayap capagnasan, detang taung atin lingap,
detang atin catuliran careng bage magaganap,
ilang sucat tang pugayan, careng mayap dang pigagap.
E. P. D.
August 25, 2023
https://www.facebook.com/eric.dizon.754/videos/741030154460015
