neng Orly Manalo Dizon;
Sucad: 6/6(12); Orthografiang: C-K(ca,ke,ki,co,cu) & h.
1
Ing’gang matatangal binang macapinac
Na niting Amanu king keang pagsalbat,
Ing pangisnaua na malalam na’ng saldac
King pangasunde na maibug neng mibatbat.
2
Obat miras kea ing calmang macanian?
King mismung labuad na de iting puersahan,
Ipapalbug pilit ban lubus miliuan
E na masambitla layun macalinguan.
3
E tamu alingad ing mumunang bage
Itang king Amanu babie tagulele,
Dacal lang pamilya ding mitutubale
Kilub ning aldoldo e da ne’ti yapse.
4
Dagdag mo ding daiuan meracal nong binâ
Meinganyung tucnang at lubus micaldâ,
King labuad nang lugal deti migdatilâ
Uaring la mong lasun bitbit dang salitâ.
5
Ua man nung e ta la alisyan ing alben
Programa king tv e dapat pang tunggen,
Anting magmasabal ing e sa paburen
Ing Amanung Sabi mangailangan sesen.
6
Caring cayanacan turu ya’t ipasa
Metung a culturang tutung mauĺaga,
PangaCapampangan ya cabud ing marca
King angga na potang king aun mitomba.
7
Lacan cabalenan a dapat magmandu
Itang panatilian ing mal tang Amanu,
Ing e ya paburen den ya’ting sicasu
Bandu caring lugal comersyu’t publicu.
8
Ngeni na’tang oras a pansin nang aduan
Na niting Amanu king keang cabilian,
Agnan tang gumuniat at layun yang biayan
MAGUINGALUNG BILI ning Amanung Sisuan.
August 27, 2023; DIZLAG Farm, Resthouse & Resort.