nang: PL Sergio Gramonte Calayag
Akakit me ining Ima, pangabuklat ning masala
Anti ya mong metung pasi, iyang tutung mamalagua
Kapagsadian keng amusal kabang anak pakakera
Ing pamangan makayapag katalakad deng anak na
Kayari na ning amusal, pipiblasan dening anak
Ila rening mamagaral pangabuklat nitang abak
Kalako da yang maglinis, iligpit na itang kalat
Saka iya ing mamipi, ketang pipian ya sumabak
Kabang iya ing mangusut, isipan na itang pagtuan
Nung nanu ing kayang lutu, keng pamangang piyabayan
Kayari na ketang pipian makayarap ne keng kalang
Misasalab ketang pali, dapot ini e lalawan
Karatang da deng magaral, makasadia itang pagtuan
Dening anak mamaglako, iya pa ing manos pinggan
Ketang kayang kapagalan alang sasyo a damdaman
Pauli na nitang lugud kareni nang pakamalan
Pangaras ning gatpanapun iyang bisang magpainawa
Dapot ini nang paplantsan, atsu ketang isipan na
Inia e man makakera, isundu na ing gawan na
At saka mimisip ngeni, ing apunan isadia na
Inia metung paganaka, keng lalaking talasawa
Nung buri yeng agad tumua, e ye saupan ing asawa
Ketang altar mitanguanan pakamalan kabang bie na
E ya rugu metung ipus, gagawan ngan itang obra
August 24, 2023