Ding macatacdang Poeta ning panaun salucuyan,
at ding Poeta canita, ning panaun milabasan,
king carelang pamangudta, metung la mu paninasan,
anting metung a panata king amanung capampangan.
Ing pacapaulagan da king carelang pamanyulat,
payabut da careng malda, mimulat la reng e mulat,
a malyaring mamye tanda careng maling pamirapat,
at careng cauatasan da, papasiag dang mitmung tapat.
Paulagan da la naman ding sablang bage masampat,
at e ra la cacalinguan ding taung mayap a dapat,
ume rong kikilalanan careng cudta rang susulat,
layun da lang pupugayan, dirinan pamisalamat.
Aggia man ing Guinung Jesus, metung yang Poeta’t uatas,
mitacdang talapangabus, king casalanan migligtas,
bang icatamung micabius king abluc na ning Satanas,
at ding caladuang meyaus, king banua la mirian bucas.
Nanupata, ring Poeta…. mitacda la at mitubud,
mengabait lang macudta, at tinggap dang mitmung lugud,
inya e ra apibata ing manayimic na cabud;
Ilang Talapagsalita careng bage e macatud.
Ding Poeta mitacda la bang ipasiag ing cayapan,
bang king yatu mandatila itang tune catimauan,
at deting amanung maula ilang carelang gamitan,
king calmang mibie carela, ibat king Dios Macapayan.
E. P. D.
Sep. 5, 2023