nang: PL Sergio Gramonte Calayag
Ume nang dalumdum mibalut king pisak
Ing mapaling aldo, albugan manakbag
Malukang karinan, manenaya’ng anak
Isagana kaya sulung undap-undap
Keng tukuran eran, akit makabatyo
Malagung asawa kakarug ya salu
Anggang e ya datang tutung e mipasno
Sintang kaluguran kabangal ning pusu
Keng dulum kakapkap, ining ortelano
Menibat asikan, pauli king baryo
Ibat yang minaswe, burak tatampiso
Pagal ning katawan iya ing akit mo
Kabud yang dinatang itali king kural
Deng kayang damulag, ila reng painuman
Saka kumang are, ini yang dapugan
Itabi reng niknik, saka bulabugan
Kanita ya manik, keni nang karinan
Isalubung kaya, malinis imalan
Ban yang mikapali, agad yang apagan
Ing mapaling kape iya ing ilupan
Kabang yang magkape, iyang mamigunam
Lawe na malaut, anting mamatiawan
Dapot ketang isip, atsu king asikan
Itang e ayari yang kayang balikan
Potang makasadia, ita nang tamnanan
Kanita managkat karening tatanam
Tutung e mipasno keni nang gagawan
Anggang e mayari, itang pamananam
Inia neng mamangan, ila reng ganakan
Dening ortelano, ketang kapagalan
Ikabit keng isip, lugud da’t kamalan
Inia pakamalan ing nasing kakanan,
September 11, 2023