nang: PL Sergio Gramonte Calayag
Samut-saring panandaman dening tau karin airport
Dakal la reng mamaniatang, ‘liwang lugal la menibat
Matula rong sasaganan, komustaan alang patad
Itang tula ampon saya, kareng lupa amamalas
Atin naman deng mamako, malungkut la panandaman
Uling ila ing miwale keng pamilyang pakamalan
Mabayat karelang takbang, pasiknangan pilubluban
Milaut la kening siping, kareng sintang kaluguran
Keng pamilyang Pilipino, sakdal tibe keng tetagan
Panikuanang abe-abe keng malukang pagkarinan
E la bisang kakawani, ing pamilya e de lakuan
Dapot dirya ing dinatang, ing pamilya iyang siran
Nung ‘tin munta ‘liwang lugal, o munta aliwang bangsa,
Damdaman mong manabilin, pabakal da’t paganaka
‘E ka sana mangalinguan, king Dios lbpa Mayupaya
E pabustan ing sarili, pamilya ta panayan ka”
At neng misan pakiyarle ing airport keng bie ning tau
Potang ating mibabait, magsaya lang akakit mu
Kening bingut a dinatang, magsaya lang e mu nanu
Yumung lugud ing mumuna, a mitanam kareng pusu
Kabud atin meangubie, iyang mako babo yatu
Panandaman itang lugma, at ing lungkut yang akit mu
Lumukub ya ing dalumdum, at ing paldas yang akit mu
Pangawala panandaman, panintunan keng siping mu