nang: PL Sergio Gramonte Calayag
Kamete na niting tau keti babo niting yatu
Itang sabla lakuan na ngan, alang dala agyang nanu
Tutung iyang alang dalan agyang metung mang sentimu
Pibandian na at kabiasnan pati na’ng kayang talentu
Tune e apagmadagul, nung dakal ka man pibandian
Potang datang na ing oras iting sabla lakuan mo ngan
Inia iya ing pagsadian ita bie tang alang anggan
At ing lagyu mung malinis tuking dai iyang dalan
Ating metung a mabandi, iniang iya ing masakit
Sasabian na kareng malda, dadalanan itang pait
Atin saken a makamal, e asaken agyang pilit
Luklukan yang ating gulung, iya ini agagamit
Metung mansyon ing karinan, maragul ya neng lalawan
Dapot iya atsu suluk, lualas na e alibutan
Keng kusina ya man munta e na agyu mang puntalan
Angga ne mu keng lalawe, ketang kaina ning katawan
Tutung dakal no reng mete, ilang etad king kutkutan
Makualta man o kalulu, tutung ala lang dadalan
Kasulatan makasulat tune ini yang sasabian
Lubas ka iniang mibait, ampon ketang kamatayan
Ala kang apagmadagul, kamatayan iyang datang
E mamili mang estado, kalulu o manungkulan
Mabandi man at megaral, ilang ating kapupusan
Inia lugud parang tau parati ‘yang pairalan