Inyang bayu-bayu ku pamu susulat
Ing kakung kuadernu, yang muna kung buklat
Reng lumang kataya salakan kong agad
Saka ko paglista kening kakung palad.
Potang ume nakung lalang kawatasan
Ilang pangara ku, king amanung sisuan
Dapot e mu pala rima reng baseyan
Nune reng kakatning suala ding aralan.
Isip ku kanita, kareng pamaskil ku
Neng pupurian da la, ustu la keng tonu
Dapot agpang naman kareng lauredu
Sanakan la sanang lisyan ring katelu.
Misan kukutnan ke, ing kakung sarili
Nung reng gagawan ku, angga lang pamboti
Ing manyiklod pari, e ku buring dili
Anya magpuestu ku, pane bandang tawli.
E naman siguru, yaku mung susulat
Karing kawatasan, atin maling salat
Reta man mangatuang poeta nang malwat
A mika-koronang..lamu bulung samat.
Kareng kapara kung minunang sinampa
A miparangalan poetang mausta^
Nung e ku man palad ing miden korona
Sapat na kanaku ing meging makudta^.
At karing poeta a ala pang libru
Dakal makibalu king kekong talentu
E ka sa’ tatanam kamua king pusu mu
Nung e ka mepili..ngening lauredu.
Anya para kaku, ing ninum kung alak
Ikwa neng agising ing maklak kung utak
Kambe nitang angel a matuling pakpak
Ayamuyut ra kung ‘suka ing masalpak.
(neng WakaOjie Mangalindan Pena)
* 21 Setyembre 2023 *