(neng tita bern)
“ating magmaragul”, ngamung magsalita,
“sumangid ning bili at karelang luka,
a bayu sarili, ing anak da na pa’
ing kumpletwan gamit, kaylangan at sabla.
“dapot atin mayli, at ngarang sasabi,
e man kanu dapat ‘pagmaragul ini
uling ining bage, tungkul ding pengari
-ing mumunang tungkul ampong pekasimpli.
“uling ining bage nung e agyu pala,
e ra dapat liban ing pamakyasawa
uling palto lamung malukang pamilya
at palto lang anak a pasakitan da.
“e ro man apalub king iskwelang mayap
at ban keng kabyasnan masanting magdulap,
ban dakal la bage mayap a adulap,
at e keng kalukan karin la mangapkap.
“reng anak ala lang utang lub nanu man
karing pengari ra, king sablang kaylangan,
nun’e reng pengari ubligasyun da ngan
a ing anak din’ deng mayap a kabilyan.”
ini rugung ‘ma mu, panupaya me sa’
a king diary mu malikut memasa,
makanyan ka lawe king keka palang ‘ma,
ding adwa nang mata, nipnap mong pemiga.
peparagul nakang e na abye mu man
ing pekasimpli mu’ a pamangaylangan,
neng misan e naka asasaling ‘malan,
alang bakal mu man neng lulub ka misan.
pamagkulang ini bilang pengari mu,
bage a king salu ing dinunut ustu,
dapot keka anak, salamat keng Guinu,
lugud ing ikit mu, e pamagkulang ku.
11/29/23 //05:02
kabang patilan ing uran
***ka-41 pyesa