(neng tita bern)
asnaku kaswelu ketang maglolo ka,
deng kaluguran man e la botu keka;
lupa kang mamulang at salbayi, ngara,
damulan mya kanu ing pusu ku pota.
dapot makanyan man aliwa ku ikit
uling sinuyu ka ampong migkapilit
agyang pang neng misan mume kang lalapit,
papasulapo lang amanung mapait.
migit kang pabanwang kanaku sinuyu,
at apalambut meng ustu ining pusu,
ikit raka kimut a tau kang tutu
a apagtiwalan ipuk kening salu.
megin ping ikata, at ing sabla binye,
gewa rakang ari kening kanakung bie
tinulug ya keka ing bye masalese,
ikang isipan ku agyang nu ku ume.
matalik mung kaul, uma mung mayumu,
malambis mung suala a mapagmananu,
pane mung alala lakwas neng ala ku
ampong gaganakan neng ala siping mu….
mu pin iting sabla meyala mung misan
inyang suatan na ku ning kekang leritan;
kabang magpatad kung durulap kabyayan,
aliwa ka pala salung pagsalayan.
salamat na mu pin pelad na ning palad
atin kang aliwang lulukubang pugad
kabang deng palad mu, kaku mo papalad,
a ketang mumuna, sangkan mung a kapad.
salamat na murin mikawani kata,
ngeni ku asanak, tagal mu mu pera;
sadya, isipan ku makayaliwa ka
inya pigtyagan mu, Adan mang kalupa.
11/29/23 //11:38
bayu maugtu
***ka-42 pyesa