31 Disyembri 2014
16 silaba, 8-8 sesura, 4 a telatag, 9 a estropa
1.
Bulung ne namang mayagtal / king tangke na ning panaun
ing banuang minye sibukan / a ngeni kekata mamun
nung king malalam mang aun / karin ya dugpa’t midaun
king amlat da ring kaladua, / mìsulat ngan, e milulun.
2.
Balamu warî napun mù / inyang mibayu ya’ing banuá
ngeni atiu ne naman king / makatakdang anggana’ná
kalupa ra detang banuang / linabas king yatu digpá
dakal la ring miumpisang / obrang ali meyari pá.
3.
Keni ta dapat malikid / karing aldo mengaralan
ban talang akit ding bage / a e mirinan kayarian
kanita king banuang datang / pasibayu lang umpisan
ding mîumpisan a mayap / a buri tang pakiarian.
4.
Antimurin, king panyatang / ning datang a banuang bayú
atin tang pangakung bayu, / munye kule king bie tamú
mekad pamanyapat ya’iting / mayap karing parang taú
o kaya king sariling bie / atin tang buring ibayú.
5.
Ating obrang mayayari, / atin mu naman ping alî
anggiang nanu pa ing gawang / panaplit at pamiraglî.
Makanian yang kikimut ing / ka’isipang e kakawanî
king kaladwa at katawan / a bisa nang bisang mulî.
6.
Ding obrang tutung marakal / a king lelangan mipabal
ila ring obra nang pará / king sariling tutu nang mal;
ding ugalî nang pipigil / king keyang pamagpabanal
ilang dapat nang arapan, / gawan, ariang mitmung samal.
7.
Inya ring aldo at bengi / layun lang pikawani Ná
ning Linalang keti sulip, / pati king matas a banuá,
ban keta atakda tayá / ing gawan ta king umpisá
angga king panyatang na ning / oras a ayari ta yá.
8.
Ating napun, ating ngeni, / atin muring aldo bukas
ba tamung mabiasang kimut, / e na kabud mu maliswas;
mabiasa tamu king siklu / ring panaun a lalabas
ban ketâ agamit tayang / mitmung sampat iting oras.
9.
Ing gulung na ning panaun / daragusgus yang pasubung
ing lumâ ume neng mamun / ketang gulut ne durulung,
ban ketâ ita nang bayung / banuang saslag ing sumulung
munye bayung kapanayan / karelang makisalilung.
MASAPLALANG BAYUNG BANWA PU KEKAYU NGAN, KABALEN
KAPAMPANGAN.
Yng Bantulut A Siualâ
California, U.S.A
San Simon