Malati ka pa mu, n’yang keka adasnan,
Mabuluk a esterong, makasanuk bawan,
Kaluat ning panaun, lungga mu’t tuknangan,
Anggang meragul la, pakpak king katawan
Ing kekang inuman, ing danum king kanal,
Dening kiti-kiti, abe’t kaluguran,
Benging matajimik, aldo mung kegisnan
Kalupang marungis, king sala misalsal
Sulapo pa murin, karatang ning ugtu,
Aliwang pamangan, ing paintunan mu,
Kareng pupuntalan, gamit ing pamau,
King nanu mang grasyang, king danup panulu
E mu apansinan, king kekang pagdugpa,
Makapal a papel, ing berug da keka,
Santing alisyan mu, a lisya ing lupa,
Mituran aliwa, uling e asangga
King panga-ligtas mu, malulungkut parin,
Uli ning lipunan, a keka tinakwil,
Salut nung bansagan, burak nung ituring,
Balana nang adugpan, ‘ting dalang pasanin
Katawang mabuluk, puring katmung dungis,
King balang kalamnan, tagle na ing sakit,
Ninu ing kumupkup, na malyaring sagip,
King makasalanang, simpang labis labis
Megi kang biktima, ning kakakalulwan,
Na dapat ding pilan, kareng manungkulan,
Pamag-nyamantala, anggat keti mimiral,
Sulapo kang lango, king yatung pibatan
Mayap pa ing lango, king lawe’t marinat,
Atin namang dangal, a karapat dapat,
Mas keng pulitikung, matako king pilak,
Balamu buwetring, kuku na matalas.
Timpapalis ning San Luis
zeran/2/23/2024