Daing ning makasalanang Tatang
a ating malalang sakit
Kanaku bang palad, magi kung bilanggu,
King metung a silid, king papag mipaku,
Ing miwale kaya, king pilang minutu,
Metung yang pasanin, kakung pangatau
Nokarin na kayu, kakung meging supling?
Ot deng aninu yu, eku apapansin,
Pamagparagul ku, kulang ba at bitin,
Marok ku bang Tata, ing kekayung turing?
Ing megi kung sala, agad hinatulan,
Kapatawaran yu, e ku ba tanggapan?
Magi king asawa, aku ba lamaran?
Tetak kareng anak, alang alinlangan
Kakung pangarate, nung ala ng lunas,
Pati pakiramdam, agyung pendamusak,
E baling mate na, king sakit adanas,
Basta’t abakal ku, kekayung patawad
Minsan aisip ku, e na bisang bumie,
Laging yakung dili, ala mang karame,
Ing aslag ning aldo, eku na alawe,
Daratang nya kabud, at kusang maglele
Nung saka-sakali, ing bie ku ala na,
King pirasong dutung, keni makakera,
Kanakung adama, mamagus ing lua,
Maski tauli na, dulut ing ligaya
Kaku ko menibat, tanggan yu’t ali,
Yaku ing Tata yu, kayung meging suli,
King pamibiebie yu, e sana malyari,
Kakung kapalaran, lakwan e ku buri,
Patawad kekayu, king kakung kabislak,
Patawaran ali, dacal a salamat,
Minsan akapiling, kekayu e sapat,
Tanging D’yos namu, kakung magpatawad.
timpapalis ning San Luis
zeran/2/28/2024