Aanam a pinggan, king metung a dulang,
Apat lang penganak, ning Ima at Tatang,
Anam lang pirasu, tuyu lang dinerang,
Kakapurit a nasi, sinanduk king kuran
Manaya ya’ng pusa, kabang mamangan la,
Nung ating mitagan, tuyung pisemen da,
Kadalasang malyari, ala ng pag-asa,
Manggamus n’ya buntuk, malak-malak mata
Y Tatang matua ne, e parin tutuknang,
Magsaka keng gabun, king aldo’t kauran,
Aplit pa ing kuku, alang nanu naman,
Ban e mipabusten, seseseng palayan
Ing panganeng anak, pegaral Menila,
Ban kanu mitigjo, pagiging maluca,
Maski manutang mu, kayang matrikula,
Matas mang patubu, kaya bali ala
Dinatang ing aldo, mebyasang sininta,
Ing pamagaral na, pig alang bajala,
King dine ning anak, e na pebalita,
Pota nanung gawan, king imua ning Tata
Apat na ing banua, agad ing milabas,
Nanu na ing milyari, balita king anak,
Ni e man mumuli, maski mu malagad,
‘Tin kayang sopresa, gawa ng pamalak
Ing oras dinatang, minuli ‘yang anak,
Maragul ne atyan, e mu na alingad,
Diplomang asajan, buktut ing tinanggap,
E ne pa kayabe, palsintan nang duwag
Meskup ya ing salu, ning Tatang king mua na,
Penandit mung bagya, migpyak no deng mata,
Lalu na’t aisip, gabun dang misanla,
Nanu lang mibangun, mewalang pag-asa
Deng anam a pinggan, lima na la bilang,
Kanita tuyu pa, ing ulam king dulang,
Mapaling nilelut, ing urang urangan,
E mu ne akakit, ing pusang danupan
Makananung kabyus, king kakakalulwan,
Nung ikayung anak, alang pakundangan,
Magpabayang labis, bilang kayanakan,
Malunus na ko man, kekayu miglalang.
timpapalis ning San Luis
zeran/6/2024