akung tuturu yu ampong daraldakan
dikil king kabilian a mimin ya sikan,
kabang ngeni ku pa linto king sikluban,
e anti kekayung dakal na lekaran….
dakal na lekaran nung gewa man ita
inia pin mimin na itang sikanan na;
e yu na payaku ing kekayung sala
king kekong kunuaring sasalba a sinta.
ring makatua napun, ilang kalupa yu
mailig manandam yayapse amanu
inia naman ngeni, nung sa’ng kekatamu,
ilang e ta balu uling ala na lu.
kalupa ra lamu reng kekayung pluma
a mandam amanu pauli ning rima,
neng misan dayu yang interu ing linia
aggiang manawa yang Kapampangan sana.
at ing sablang manong, balu yung paniaptan
karing mangalalam amanung selansan,
king dayung amanu biglang salatanan
lius karing bista man Kapampangang mayan.
kayi reng asbuk yu potang buklat yu la,
ikeng kayanakan, ikeng makisala,
kabang iko mismu, king amanung mana,
ikong alang lunus a mamile keya.
nung gagamit ke man amanung aliwa,
ita ing kekaming senayan pablasa,
at e yu kalupang mamanustu mo sa’,
dapot ing tula yu ing dayung salita.
kayi milingat ku, ikit ke ing pluma,
aggiang e bubulad dapot titiman ya,
ngaku, “ay salamat, paninap mu pala,”
dapot nganing pluma, “e paninap ita”.
03/03/24 //13:57
kabang paglarinan ke ing kakung laurel
