neng: Princhipe Nang Bebang
03/04/2024
‘Pakapakiramdaman yu ing tuturu dang kabyasnan
Dapot e yu pakyapusan ing panugali dang basan.’
Ali ku balu nung bakit malungkut ku panandaman.
Nung kapilan ding Sundalus ning Amanu tamung Sisuan,
Merakal lang mitas ranggu’t meragdag a kabilangan,
Kanita ya pa mas lalung linto ing pamisagsagan.
Ali lingad karela ngan ing misyun da’t katungkulan.
At ing kamatutwanan pa metung la mu buring gawan,
Yapin ing ipaglualu ya ing kulturang Kapampangan,
Pasiknangan, palabungan angga na king kamatayan.
Mayap pang palak kanitang e la pa kikinang kanwan.
Akit mu king ugali da ing respetu at kababan.
Dapot ngeni pauli na ning tinggap dang karangalan,
Ali no byasang tanggap man king sarili dang kamalyan.
Anya nanu ing gewa da? Memanikdo lang aguman.
Abe abe lang kang Pedro, abe abe la ding kang Juan.
Awsan dong “fake” ding keng kayli, “bayaran” no man ding king wanan.
Mesira ya ing leguan na ning Parnasong Kapampangan.
Nung tune nakong sundalus ning labwad ta’ng Kapampangan,
Ilukas yeng piraragli’yng unipormi ning katasan,
Ing itas yu’t pagmaragul ing bandera ning kababan,
Kanita mas akwa ye pa ing respetu ku kekongan!