nang: Poeta Sergio Gramonte Calayag
Ing manialing bakal bote iyang kakung apalabas
Kening kakung panimanman mibalik ya ing milabas
Itang napun nakadua na, keting isip akabakas
Iyang kakung adalanan, e mebura, e kinupas
Anak ku pa mung malati, atsu ku elementarya
Mamaglaku kung ice candy at miyaliwang paninda
Ilang paglibe kung bote, kalibe na ning paninda
Makadapuk lang linggotse king palengki pisali la
Makabilad ketang pali iya ining pibabata
Karas lalam ding pun dutung salilung ku’t magpainawa
At nung miras naku naman lalam na nitang saresa
Aku ining manalukyat, at mamupul ku pang bunga
Kening isip makalulan ining mabie kung paninap
Itang bukas a paratang iyang kanakung pigagap
Iyang kanakung gagawan, kapagsadian ketang bukas
Ban kanita keng pamilya e ku metung mung pabayat
Ing paninap yang pegobran, pegobran keng makagising
E matudtud at malakak, e metupad pangagising
Iyang atsu kening lele, at pinayud nitang angin
Ala mang megawang takbang, at mitakup na ing silim
Nung buri meng pakiabutan nanu ya man ing paninap
Ika’ng kimut at magobra ban ayabut kareng palad
Tune e mamungang ubas nung tenam mu metung biabas
Ban ayabut ing paninap, magsipag ka ampon gunyat
