nang: Poeta Sergio Gramonte Calayag
Nung wari keng Santacruzan, Indang Ofring ya ing Reina
Malagu ya’t maganaka, iya ing Reina Elena
Kening sabat Santacruzan, aku naman consorte na
A tinapat ketang Goydo, ing prinsipe ning Borgonia
Dapot ini bungang isip, arapan ta ing katutuan
Indang Ofring yang mepili, Most Outstanding Kapampangan
Iya ining meging Reina, keng kultura tamung menan
Agyang atsu na keng idad, iyang tutung matenakan
Ketang kayang kayanakan lalage ya keng zarzuela
Dening tau yang abangan ining malagung artista
Damdaman me neng gagale, maka-wiling damdam kaya
Malino la reng amanu, uling iyang tutung biasa
Malagad la reng poeta, masabal da keng kultura
Linabas man ing panaun, iya pa rin ing dadala
Makaniang ya’ lndang Ofring, talinu na e mamala
Kagiwan na iyang akit, keting labuad tamung sinta
Ining Reina ning Kultura at amanung Kapampangan
Menibatan ya San Luis, ing balen ding mangatapang
Dr. Amado M. Yuzon iya ining pitunganan (1975)
Keng gintung coronang laurel, laureada yang tatangalan
Keng idad nang noventa’y dos, akit kaya ing kagiwan
Ing lugud na keng amanu, at kulturang Kapampangan
Tutung ini e kinupas, keti labuad tamung menan
Tune metung alimbawa a dapat tang pamarisan.
