nang: Poeta Sergio Gramonte Calayag
Ilang mikit pasibayu Atseng Miding at ing Ari
Ketang metung a tiuntiunan karin king Angeles City
Ginanap keng penikula, ining penikulang Ari
Keng produksyun na niting Holy Angel University
Atse Miding yang asawa, niting payat a poeta
Iyang metung talasulat talagambul ning kultura
Palablaban ing amanu, pati na’ng literatura
Keng milabas a panaun, melumpawi ya’t mewala
Ating anak a manintun, panintunan ing poeta
Iyang bisitang pandangal, keng tiuntiunan a gawan da
Inia ‘yang penyalugsugan, at penintun ing baryu na
Kabud iya ining ikit, sinabi na ing sadia na
Maganakang Atseng Miding ‘lang patugut manantabe
Kening kalulung poeta, at matikding talagale
Alang damdaman saingsing, kakaluluan na niting bie
Pablasang bie ning poeta, iyang dimut keng pagkabie
Dinatang ya ing poeta kening mesabing tiuntiunan
Iya ini ing inawus ban igawad ing parangal
Kabang iyang magsalita alang taung makirandam
Uling Mayor ing dinatang iya ining sisikasuan
Melungkut ya ing poeta, penandaman itang sakit
Malumpawi ing kultura ‘lang taung magmalasakit
Dinatang ya ing panaun, ketang kabilian nang gipit
Iya ining meangubie, ating salpak ampon pait
Makanian ya ing istoria ning mesabing penikula
Tune yang malulumpawi, ing amanu at kultura
Inia metung yang panagkat ing kultura biayan taya
E pabustan iyang mate, kapampangan yang kaladua
