nang: Poeta Sergio Gramonte Calayag
Iyang kanaku mung dimdam, menibatan king asbuk na
Kang Obispo Ambo David, keng arap na ing kamera
Keng CLTV 36 ing mensaji yang babie na
Patungkul ya keng maleldo, nung nanu mo ing kanan na
Mekibat ya ing Obispo, keng maleldo iyang kanan
Ing ginilu yang simbitlan, iya ini ing maniaman
Pamangawat keng sarili, tune ini iyang gawan
Panagaka kareng tau, keng maleldong pagmasusian
Ing ginilu at kamuti ngening aldo Viernes Santo
Iya ining kakung apag lalu kareng bisita ko
Anti ya mong pamangawat, disiplina yang gawan ko
Keng pamangan tutung ditak, anting metung sakripisyo
Ing ginilu yang magawa, kidkud ngungut yang apsalan
Malinis danum yang ‘samut at kabit ya keng lulanan
Sangkapan ya keng mayumu malinamnam nung atakman
Ining pamangang makanian, pamangan yang kapampangan
At nung misan ing kamuti iya ini ing yayabe
Kainum mu keng ginilu, salakan ya ing kamuti
Tune ya pin king kaniaman, kening simpling pamibiebie
Dapot iya ing piglibe, keng Mc Donald at Jollibee
At neng misan pigan neman, mayayaus ya kanita
Potang ini yang sangkapan, dening anak pakapila
Tune simpli ya mung anda, atin saya tanggapan ya
Ababakas ketang lupa, itang tula at ligaya
