neng: Princhipe Nang Bebang
03/20/2024
Mala-Soneto
Ing bie, pansinan me, neng kayi e patas.
Lawen mu king obra akit mu’t amalas.
Ding alang gagawan magsweldu lang matas,
Kesa karing taung mandilu nang pawas.
Ding tapat king laban ilang masasambut.
Detang mamurayit ila pang manyambut.
Ing bie makanyan ya binang makalungkut.
Detang alang ala ilang mikukutkut.
Agyang nukarin pang aspetu me ike’
Pikwaltan, kabyayan, nanu ya mang bage.
Agyang ing justisya e ya pante lawe.
Masakit man sabyan e ya patas ing bie.
— O’bat makanyan ya ing bie keti yatu?
— Itang kamulangan iyang lulto ustu!