neng: Princhipe Nang Bebang
Mal kung balen na ning Betis a kekaming pituknangan,
Metung nakang alimbawa nitang matwang kasaysayan.
Balen ka ping mituburan ban manyuling kaparian.
Kuta daka ring mandukit a awsan dang matenakan.
Mibantug la ring anak mu uli na ning gelingan da.
Ikit na ning meto yatu ing santing dang manigobra.
Mekilala la king arte, king dukit at iskultura.
Mibantug la king sipag dang pamaglingap king kultura.
Mayor Santiago’t de’ng Torres tutung mayap lang pamuntuk.
Ligon, Ramos, Simon Flores ken nomang arte milukluk.
Willy Layug at Juan Flores bantug la king pamamulpuk.
At Obispo Pablo David king bie pari neman mipuk.
Agpang king kasalesayan lagyung betis menibat ya,
King maragul a tanaman a makatikdo kanita,
Nung nukarin sasabyan da mamabut ya’ing alino na,
Karing Baryu ampong Sitio a ngeni sasakupan na.
Dening patron da ring baryu ila dening Santa’t Santo-
Santa Ursula, San Jose, Santa Ines, San Juan Nepo,
San Juan Bautista, San Miguel, San Agustin, San Patricio,
Virgen Maria, San Nicolas at ing Apostol Santiago.
Mabye ing matwang tradisyun antimo pin ing batalya.
Ing masayang pyestang balen ustung Disyembre a-trenta.
Ing asad nang Apung Jose-prusisyung makaba pila.
Syam a aldo namang misa para karing mangubye na.
At ining bayung tradisyung awsan dang dukit festival,
Tetag de ring kayanakan ban ablasan da ngan pagal,
Ing sablang grasyang tigtug na Ning Dios Ibpang tutung Banal,
Anting pami-pasalamat king kalam a mipnung dakal.
Ing kabyayan keti Betis malagwa mu rin minusbung.
Merakal la ring mandukit at gagawang obrang dutung.
Meragdag la ring mam’ritung chicharun a mangalutung.
Minasensu ing kabyayan masalusu pang sinulung.
O kanyaman manuknangan king balen a kakung tibuan.
Payapa ing pamibie-bie karing pusu ning ninuman.
Pablasang ding tau Betis king grasya mipagkalaman.
Agyu dang ibalik king Dios, sablang kapasalamatan.