Pun ning baliti

Posted on September 1, 2022 by inglibrarian

Uling pane dang papatdan ing sulu ngeni , makatakut lulwal dalan pota apaindalan mu deng manabit o kularyut ,magkwentu tamu….
Anyang minunang panaun atin lang pitatakutan

Atin pun na ning baliti
atyu butarul baltangan
Makamaputi a susulud
pisak ning benging malalam
Masalusung lang pupulayi ding tsinelas dang tatalnan
Makapiyak a mata ra ninu man keni dumalan

Makatiwangwang a gabun malapad lapad a sular
Makamaputing babayi patye bengi keni lulwal
Dening manwala’t tatakut lalu nalang miparakal
Potang atin nang dumalan mangatug la tud gagalgal
Pangaras ning pangayabak ini yang dang pitataltal

Kulyat- Sampernandu ding thames gagamitan pamasada
Dening Driver at konduktor ilang pane lmisasangga
Ing Piesta nang Apu karelang piadya
Madalumdum a dalanan king oras ning alawuna
Mangalampag basyung biayi
pang kape da man ala pa

Atin memarang babayi tiknangan de at seke
Maka maputi imalan makaba kaba ya takde
Ing matingkad nang susulud ing manguleng mala nebe
Mikatakut a kondoktor e akwang milawe lawe
Gagalgal ampong magnerbiyus mibalut kaya minakbe

Batyon batyon neng malati king salamin ne lalawan
Siknangan kabud ing lub na at tsaka manene neng kitnan
Obat kitang ing susulud
imbis ing kayang kuldasan
Simbitla kening babayi obat maputi kayu imalan?
Mimwang babayi, mekibat
keng TIDE pinipi ke pa yan!!!

kapusungan kwentu
Neng Herman Pablo

Posted in Poeta Herman Pablo | Leave a comment

SABING CAPAMPANGAN

Posted on August 30, 2022 by inglibrarian

neng ORLY MANALO DIZON, Sucad 12; Orthografiang: C-K; August 2014

1.
SABING CAPAMPANGAN metung yang pamana
Sinese gimbulan da ding nunung matua,
At caretang suli tiru deng mausta
Amanu tang Menan kegisnan cultura.

2.
Maulaga ya king ninu man lelangan
Itang cayang lagyu puri at dangalan,
Macanian ya naman ing Amanung Sisuan
King isip sa kintal bilang Capampangan.

3.
Importanti ya king aldoldo tamung bie
King pamilaguma e ya sa lilele,
Detang cataya na ila sang iyapse
Ning Sabi tang mana culturang dalise.

4.
Labuad Capampangan uling king leguan mu
Santungan da ca ring miayaliuang tau,
Ing bitbit dang sabi ya’ng babie calbaryu
A maging lasun king Sisuan mung Amanu.

5.
Labuad Capampangan lugal cang masampat
Marcang e alingad ya’ng bunduc Arayat,
Vulcan Pinatubo ya’ng keca pesicat
Deting marcang lugal keca macacauat.

6.
Itang magmasabal a cacung cabalen
Sariling tang Sabi e dapat paburen,
Mialiuang lenguaji e no dapat tunggen
Careti paglualu amanu ya’ng sesen.

7.
Matenacan uatas ugaling mabinti
Ampong cayanacan sagipan ya’ng laji,
Ibie ing cagiuan ban e maduahagi
At paglualung ustu bilang keang sapni.

8.
King pibale-bale iya ing gamitan
Apat nang suluc ning balen Capampangan
SABING CAPAMPANGAN iti palabungan
Gambulan, isulung miyaduangan ta ngan.

DIZLAG FARM, Lara, City of Sn. Fernando

Posted in PL Orly M Dizon, Poeta Laureado | Leave a comment

Aldo ning Amanung Sisuan 2022

Posted on August 28, 2022 by inglibrarian


https://capampangan.whereishome.info/mangapampangantamu/MangapampanganTamu-Blg12.pdf



https://www.facebook.com/groups/mangapampangantamu2022


Posted in Anac Ning Arenas | Leave a comment

Magkwentu tamu pa!!!

Posted on August 24, 2022 by inglibrarian

Ing malasing ampong kargadung droga ( shabu)….
Atin malasing ampong kargadu ya pang droga keng kalasingan keng alak ampong droga aisip nang ilage ne itang makasalikut nang granada… Tambing linub king utak na ing kamwa ampong gumanti kareng kamwan na, kening isip nang atsanan nalang granada , obat mikatagum mipandalan ketang bale ning pulis malapit ketang tuknangan da, na misan dinakap kaya keng pamangulu na keng lugal da, ing pulis yang apagdiskitan na . Lumwal ka keni magmamatapang pulis patola! Masikan nang gulisak alus dimdam da ngan deng keng malapit a siping dang bale , iyagkat neng tumbukan ing pulis, gewa ning pulis , sinabi na namung muli naka, bang e da naka bitbitan pasbayu at idala munisipyu, uling e bisang lumwal ing pulis linwal neng tambing ing granada na at tsaka pasbayung ginulisak masikan, ‘ nung e ka lumwal ngeni murin iyatsa ke ing granada keng bale yu mamilang kung pitu tsa ne tatalnan ing granada makatas la reng gamat na, mamilang naku nganang mamatakut , wan…tu (sabe buklat kareng taliri na senyas ning kayang pamamilang ) tri … por ( pepakit na tinggal ne ing pin ning granada) payb ( meyari nala deng limang taliri nang sesenyas anya sinipit ne pa ing granada kareng puad na bayang makapamilang pasbayu keng metung napang gamat , deretsu na pamamilang ) siks , seven!!! Baaaaaaang!!!
Ing muting akalingwan neng makasipit ing granada kareng puad na…

Liksyun…
Pota pin malasing ampong makadroga e mu balu ikang makamate keng sarili mu…
Yari ne pu..

-Herman Pablo

Posted in Poeta Herman Pablo | Leave a comment

O INDUNG SALITA

Posted on August 24, 2022 by inglibrarian

Neng ORLY MANALO DIZON

1
Ing Sabi tang Mana ya nang kegisingan
Ampo ya’ng keragul king bale carinan,
At kecaban ning bie e ke’ti kelinguan
King angga man ngeni a casalungsungan.

2
Dapot itang ngeni maliliari rugu
Dacal nong salitang daiuan a gugupu,
At meki-agum pa ding magsilbing paindu
Da reng sibabale e da ne tuturu.

3
Ing Amanung Sisuan uaring pakiuangis
Keng metung a gamit a birianan labis,
Pecasinup ya’ti layun pecabigkis
King ban e mabating ‘tang mal nang kilatis.

4
Pero tutu niti ing bigu nang calma
King panga-lele na silbi na meuala,
Uling king sinupan na’ ti maluluma
Ing mal nang kilatis minta ya king ala.

5
Macanian ya naman ing Sabi tang Menan
E dapat sayangnan ing keang casilbian,
Dapat yang gagcas king pamitalamitan
King ban deng alisu dening cayanacan.

6
Caring matenacan, maticding Poeta
Ibie ing masabal king Amanung Mana,
Ilage ya’t tasan gulis kecong pluma
Bersu caring lira’t linyang pacarima.

7
E gagauan itang cabud na tahimic
At paburen rugung king lele mipilpil,
Ban kegisnan Sabi ticas na magbalic
Ing gambulan, sesen keca macarikil.

8
O INDUNG SALITA nasa cu’t paninap
Itang idaun ing cailangan mung lingap,
Sesen, pacamalan ing salu calangcap
King ban mabitasa tagimpan mung manglap.

Aug 6, 2014; DIZLAG FARM, Lara, City of Sn. Fdo.

Posted in PL Orly M Dizon, Poeta Laureado | Leave a comment

PAMPANGA

Posted on August 17, 2022 by inglibrarian

Irvin Harvey Rivera
Siuala Ning Maliwalu/Anac Ning Baculud
August 10, 2018

Dakal nong Balen ding ka’kung apasyalan
King Probinsya na ning Labwad Kapampangan
Magalang, Angeles, Mabalacat, Sasmuan,
San Luis, Masiku at Balen kung Tibwan. (BACULUD)

King Florida, Lubao, king Porac at Guagua
Balen Sta. Ana ampong Sta. Rita,
Apalit, Masantol, at ing Minalin pa,
Balen Macabebe–minunang PAMPANGA.

Mipamulala ku Ciudad Sampernandu,
Balen Sto. Tomas, Candaba ‘bat naku
San Simun, Arayat ilang meging sepu
Ning pamamasyal ku king Probinsya tamu.

Ingsanu mang Balen kareng mesaglawe
‘Lang tulak, kabiran, miwaglit, milele
Nu’ ku man bait at mirinan nang male,
Labwad Kapampangan, e ke pakilibe.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

PANINAP

Posted on August 17, 2022 by inglibrarian

Irvin Harvey Rivera
Siuala Ning Maliwalu/Anac Ning Baculud
August 16, 2018

O ba’t mo dalit ku at nanu ing sangkan?Kasumangid na ning mura kung kaiisipan.
O’t magtumaila ku, dapat kung ukulan?
King mura kung isip e ku pa aintindyan.

Ukulan kung mayap e ku maguing dake,
Maragul a saup king nasang tagumpe
Nanung asawup ku at kanakung abye?
Metulsak kung isip e pa mipapakde.

King kayapan at king masanting a dapat
Metabang na ku lub at megpalat-palat
Na’n ku mo tang gawang bague a masampat
Nung karing mapilan iti e man sapat.

Makanyan keng pikli pluma kung mataram
At sikwil ku na ing kagiwang pigkalam
Ding kanakung kudta kitkut kong malalam
Bang ding siwala da e no ngan maramdam.

Kabang mangulkul kung malalam a awun
Bigla kung mipakde king pamikatagun
Malungkut a tangis menibat king gabun
Peganaka na ning matimyas a napun.

“Migising ka!” ngana, oras nang mipakde
Aku’ing Amanu mung malapit nang mate
Kwanan me’ing Pluma mu’t gumulis malale,
At ing kekang diwa pakapatilon me!

Malagwa keng pingwa sinimpan kung pluma
A sinaguli nang mineng pepainawa
Saka ku sinulat makabersung rima
Kabud mipakde ku, maninap ku pala.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

Paldas A Parangal

Posted on August 16, 2022 by inglibrarian



Kang Poeta laureado Pol Batac

*
Misna yamu king kakuyad, ing bie tamu babo yatu,
bala mu ing kapilan pa, ing panaun ta’ng pisulu.
Ngeni o yan, memun na ka, gilutan mu ne ing yatu,
ban kapilan man e na ka, magbalik pang pasibayu.

**
Mabayat man king salu mi, sukat mi iting tanggapan,
uling anggiang nang daptan mi, e magbayu ing katutuan,
a ala na ka siping mi, meko na ka kaluguran,
at e ta na akuang mikit, angga na king kapilan man.

***
Dapot karing kekeng pusu, kapilan man e ka mate,
lumabas man ing panaun, manatili ka rin mabie.
Ding mitmung tulang pinandit, ning mapaling pamiyabe,
magdatila lang sagiwa’t king isip mi e miwale.

****
Ding aral a pemalino ampong dinake kekami,
gawan mi lang dalerayan ban e mi akuang malili.
Ilang magsilbing guyabnan ustung tatalunntun kami,
king talete na niting bieng susubuk king kagiwan mi.

*****
Lakuas mi nang e kalinguan ing lugud mu king amanu,
a king kabilugan mung bie alang sawang gimbulan mu.
Ing masabal mung pepakit king menan a sabi tamu,
apusan mi’t ibalaus, king saup ning apung ginu..

******
Panikuanan ming atukyan, ing bakas a kekang likuan,
ban sanang anggiang bagya mu, akua ming apakyapusan.
ing gelingan mung gumaleng poesiang makabaldugan.
a yang migpabantug keka king mabilug a balayan.

*******
Silung Poeta laureado, ume na kang magpainawa,
ing misyun mu keti sulip, yarin itang merapat na.
Salamat king kapagalan, oras at pamibabata,
a inampang mung laus lub, king mal tamung sabing mana.

Rodel E. Gozum
May 15, 2022
San Simon

Posted in Uncategorized | Leave a comment

🍀 Mayubung Kausukan ☘️

Posted on August 15, 2022 by inglibrarian

E ku la paluban deng mangarawak a bage keng pusu’t isip ku, ba lang e masira retang mangayap a selikut ku.🌹💚🌷

May be an image of tree, outdoors and text that says 'E kula paluban deng mangarawak a bage keng pusu isip ku, ba'lang masira retang mangayap u selikut ku. melanie'
Posted in Poetisa Melanie Cunanan Naguit | Leave a comment

Ing Pamilyang Kapampangan

Posted on August 15, 2022 by inglibrarian
May be an image of tree, sky and text


Ding e patugut magobra kalupa nang koyang Mandu,
Roel a balisang pulis magobra king Munisipyu
maranun makagising ne
i Mariang magtindang putu
kabilang de ding magtindang
tambing nang atyu keng puestu,
Ding magobra king eskuela
a mangalati mu sweldu
itang mepilit mig- abroad menulakan a kong Dariu
i Roman ken ne man sabung kukulyo mag-kristu-kristu
alang patugut a kakayud Robert keng jeep magmaneu.

Manalbe ka king balita dakal pang mangapalyari
abalitan me i koya inabusu ne i wali
dening magaral nang anak ken lang bisyu mengawili
Ing bunsu nang pakamalan yang idad na pang katorsi
kareng asbuk ding aliwa dimdam na, atin sinabi
Ikit ke napun anak mu
yang mabuktut ne pala iti
Iting sakit ning balayan karing balisang pengari
ning pamilyang kapampangan king keyang pangaduajagi.

Mengalinguan a pamilya king ugaling pimamanan
nukarin la ding pamilyang
neng sisilim mikakitt ngan
Ing piyadian dang orasyun
neng apunan bayu mangan
kaybat mengan ding miyanak akit mong mipagkwentuwan
ding anak biasa lang siklod bayu munta king ulunan
ding pamilyang mangasaya bukas da e gaganakan
bie payapa ing kanita obat ngeni milibayan
king bie dakal a ligalig ngeni ampon king daratang.

Ing pamilyang kapampangan mibili quing ‘under attack’
keng mayap a kaugalian mewala yang ditak ditak
mamaligwa tang minono
kapanintunan midagdag
mapagal tamu katawan
mebating ing pamanlingap
pabaya kening pamilya
lula kening magaganap
Ing pamilyang kapampangan
lilisya king map a daclat
dakal no ding miyasawa king sumpa ra e na tapat
mamiligrung nang miragsa ing marangal a sosyedad

Mipnung aklis kung kinudta
ala kung nasang paturan
mamalita kung siwala king magaganap king tibuan
Nang agawa ning memalen magkulangan nang kabiyayan
karening pengarring meko
tinalas king kasakitan
atin man a menagumpe
a manabu king kabiguan
nukarin! Nu ne miparas ing maningning a tagimpan
nukarin ne ing dangal na ning pamilyang kapampangan?
Nung lasak ne ing pamilya , ing bangsa lasak nia naman…

‘ing Pamilyang kapampangan’
Neng Herman Pablo
August 13, 2022

Posted in Poeta Herman Pablo | Leave a comment