Kapampangan Library

Diuang capalsintan neng ORLY MANALO DIZON;
Sucad:12 silaba-rimang amanu balang canam a silaba(6/6);
Orthografiya: C-K; Nov.18, 2019.

1 (rimang-ang/a)
Misna ya king linang / itsura ning banua
Cule asul ya’tang / pisni na’t aura,
Ing leguan a keang / dadake king mata
E a’larauan ‘tang / ala yang capara.

2 (as/ang)
‘Ya pala ing senias / ning kecang panyatang
King bie cung magpaldas / magluang alang tucnang,
Bie cu miden lunas / king uli mu irang
Maco sa ing caplas / king bucas pang datang.

3 (us/û)
Menyud no king agus / ding salbat ning pusû
At kinating lubus / dusa kening salû,
Ning sintang tinandus / na nita nang paslû
Lugud a micabus / layun neng mibubû.

4 (a/ug)
Ngening atiu na ca / king cacung panirug
E cu pakit keca / ing lunto cu’t lumbug,
King lagiu ning sinta / at kecang alindug
Ilang cacung sagca / king palsimi’t albug.

5 (i/u)a
Pebangal me’ng pisni / na ning kecang yatu
Lubus meng pebandi / bucud mu canacu,
Salu cung mapali / iti keca ya mu
Sumpa ning sarili / ing e cu maglilu.

6 (e/a)
Dacal no ring tangke / mepanat king sanga
Ampo detang uake / a besis memunga,
Ila ring mi-ugne / cambe ning ligaya
At lugud pinande / ning sintang maula.

7 (u/it)
Balic-balican cu / at keca sisitsit
Itang e magbayu / keca e pagcait,
Paslu nang Cupidu / ya’ng cacu kinabit
Kening pangatau / king pusu midukit.

8 (uc/a)
Dacal nong pagsubuc / king bie limpusan ta
Ampo retang abluc / ning baual a sinta,
Lugud sari lusuc / ya’ng yampang cu keca
ANGGANG TAULING SIGUC / na ning pangisnaua.

DIZLAG FARM & REST HOUSE, City of San Fernando

Talabaldugan Amanu agpang king pangagamit da kening Cauatasan:

1. misna king linang = malinis at malino acakit ning paglalaue.
2. miden lunas = miyatbanan lang tune capakibatan.
3. minyud no king agus = minagus no’t tinulandung king danum a mamagus.
4. ilang cacung sagca = ilang cacung matibe pangambil.
5. ing e cu maglilu = ing e cu mangalinguan o magbayu.
6. ila ring mi-ugne = ila ring panaun a mintabe king bie
7. paslu nang cupidu = panang tatarac king pusung lulugud – bilang “alamat” ning pamicalugud
8. a) ampo retang abluc = ampo retang e mayap a panagcat.
   b) lugud sari lusuc = lugud a migit palac king tune a e mu alarauan daramdaman ning tau.

Dacal pung salamat kecongan.

neng Orly Manalo Dizon
Sucad: 8/8; Orthografiang: C-K; Jul. 15, 2018.

1
E alisyan gunaman ding / macule aldo miralan
A dinake rang penandit / ding uma mung misnang niaman,
Migsale la’t migdatila / kening pusung manandaman
At keca cu mamasa pang / misan mu cu pang balican.

2
Pangauale mu siping cu / ining bie cu mengulila
Caring lambis mung mayumu / kening pusu pepamana,
Inia king angga man ngeni / e cu alus ayaguanta
Uculan itang cacu ngan / mipapatan ing parsala.

3
Ding canita a mapilan / mung paglaco atin aclis
E alingad lua ding mata / king pisni mu mamalisbis,
At caibat ning pilan aldo / uling e mu la atikis
A pisicub tang maula / sucal mung lub mapapalis.

4
Itang paglaco mu ngeni / malualas cang lub ginulut
E co akit king lupa mu / o abacas itang lungcut,
Ding mata mu ilang babie / senyas kecang pamanglaut
Ala lang lua ‘giang capatac / king panirug minie tacut.

5
Inia ngeni cu abalac / nung nu anti ing ala ca
Icang pilit nang pakiduang / ning magmalun cung caladua,
E cu balu nang carasan / na ning pusu cung magdusa
A nu anti at angganan / nung capilan cu abata?

6
Ing maralas ‘tiu cu ngeni / kening tucuran ning eran
A canita ica itang / manaya cacung panyatang,
Itang ngeni maliliari / acung pane mamindauan
ITANG KECA MANENAYA / uari’t misan ca pang datang.

DIZLAG FARM, REST HOUSE & SWIMMING POOL; Sep 11, 2022

neng ORLY MANALO DIZON

1
ING URAN grasya yang / mebaldug ‘bat babo
Paninasan datang / dugpa neng caleldo,
Ban malanging gabun / basan na at laco
Ita nang lisangan / at matsurang singo.

2
ING URAN ya itang / king ucul dang pane
Da ding ortelanung / mananaman pale,
Iya naman itang / aldoldo panyese
Caring anggang tanam / akit king marangle.

3
ING URAN gamit yang / licas a maglinis
Caretang aspaltung / dalan a madungis,
Paragus na’ng dinat / a mangaparalis
Caretang imburnal / iti mamalisbis.

4
ING URAN ya naman / bucud dang cailangan
Da ding cabunducan / bilang salud uran,
Ya’ng paragul caring / dacal a tanaman
A cabilugan ding / ausan tang cakeuan.

5
ING URAN e uari / babo ya menibat!
Ning Ginu king tau / iti ipamulat,
E ya geuang tau / a silbag ding gamat
Nune ing Ginu king / labuad sasambulat.

6
ING URAN metung yang / cailangan ning tau
A marapat denan / a masusing lisu,
King ban e manyira / maniagasang ustu
At maglacuan dulum / caretang bie tamu.

7
ING URAN parti ne / na ning Calicasan
Inia pacasurian / ya’ng keang dagusan,
Ding paligi’t tusang / dapat lang linisan
Ban alisyan itang / lugmang capalaran.

8
ING URAN denan yang / ustung pamagmasid
E ta abusuan ing / sabla king paligid,
Nune gauan itang / dapat mangaintulid
Ban ing bie e ya king / aun mitalabid.

DIZLAG FARM, REST HOUSE & SWIMMING POOL, July 2017.