Kapampangan Library

Neng Herman Pablo

Ayagcat da cami (home of the aged ) mamisita
Kekeng pasalubung karela idala
Dening kayabe mi mirake lang kanta
Atdanan lang tula dakal a mangatua
Mengasaya la ngan ikit mi karela
Aliwa ming abe
mekipagkwentu la
Balisa naku man nanung agawa pa
Ditak kung asaup adake karela

Atiu ketang lele ing matuang babayi
Malungkut nang timan pilit mu king ayli
Linapit ku kaya banting akasabi
Pilit keng libangan yakung magpakayli
Ikit keng mesaya mibuklat ya labi
Migkwentung marakal bie na milyari
Genaka ing napun kutang king sarili
Obat ngeni kanu yang magdili dili

Sakit king kilub na kaku pepalwal ngan
Dudugdug keng salu nukarin migkulang
Simbit ding anak na matalik liguran
Manibat malati e kanu migkulang
Gewa ing agyu na apayari no ngan
E na atanggap kalma nang dadalan
Karing atlung anak malwat nang panayan
Ala nang manapa karela metung man

Kakasakit nang lub (home of the aged) de dela
E uari malyari tuknang ku karela
Tutulu nang lua kabang magkwentu ya
Isipan na namu nanu ing manaya
Saplid a palasa binye ding anak na
Ing lugud ning indu ibat pa kanita
Kalbaryu nang dela meging penata na
Miglakbe king bie maymut a ligaya

Ding atlung anak na gilutan de kabud
Lubid ning amnesia karin la mibuklud
Manintun pengari lingap da at lugud
Memaniplad la ngan at pepainggulut
Kapilan balitan potang mayna na tud
Potang e na muran at ala nang duldul
Panenayan da pa bie na mapatlud
Karin la manyatang tsaka la ngumulngul

‘ nanan me pa ing dikut, ing kabayu ne mikukut’
….’nanan mu pa ing kumpe kabayu ne mete’

Neng Herman Pablo

Kapilan daka asungkit, talang maslag at maningning
ngening ing kakung panyungkit maimpis yang anting tingting?
Lon me, mangabayuktut ya indat tyupan at ne ning angin
at malagwa nang miragsang mikakasat ketang uling.

Keta naman barandilyas na ning awang ning palasyu
Ika ing malutung rosas a belibaran dang lasu;
buri da kaman sugkitan kening pibuknul kung tambu
magkasakit ku pa mu rin, papakli ya at duruku.

Pigampa dakang ayaplus da ring kanakung taliri
ban mu sang mika-kasnawan kening pusung mebalani;
o’ nung misulapu ku sa, sulapo kung e mangimi
ayan da ka king jardin mu agyang dimut mung saguli.

Iyayampang ining gale,keka, malagung dalaga
kambe na ning kakung payul maging ma-ingat ka sana;
Dakal la ring baintaung bisang makabandi keka
uling tala ka at rosas king telatau rang mata.

Inya sana O’ dalaga e ka dagling payamuyut
karing makipulut dilang malambis mangilindayug
uling kabud mibagsak yang mebalbal bugbug a lusuk
ali mu ne asubli pa, makanyan ing kakung usuk.

Neng Herman Pablo

Dening aduang miyasawa / ilang atyu babo kama
Matula lang mipagkwentu / king panaun milabas da
Ing babaying mengutang ya/ kaku mikasala naka?
E naku mwa, matua tana /mangulta sabyan mu ngana

Sabi ning lalaki kaya / apin ing kekang kumari
Tambing ne pin mimua’t mibua / yana pin ngana ning lalaki
Kasasabi pamu kaku / kwentu ku keka mung sinabi
E naka mimimwa kaku / tutal ita’yng pekatawli

Sigi itamu ne ngana/ ing lalaki itamu ngana
Tutu ala nang aliwa/ ing yaku namu tagana
Balu mung kaluguran daka / balumu ika’kung sinta
Saugli ngana ning lalaki / ika naman kutnan kaya?

Atatandanan mupa anyang / ikang pepabagut ipan?
E uari ing lipit kata / ala kang kapanintunan
Dentistang linawe keka / maratna nakung lalawan
Ing dadala kung bibingka kinandut ya’t mekatakman

E naka mimimwa kaku / ika’yng liguran kung tutu
Iti ya pang mipasbaywan/ liksu pangalalaki mu
Atatandanan mu kanita / anyang mesakit ka pusu
itang menopera keka / bang asalba da kamu

Aru !!! ngana ning lalaki/ sana ya namu ing tauli
Ing babaying mipatiman/ at tsaka pa ayli ayli
Tanda mu anyang tagal ka/ aburyanan ding botanti
Minyambut kang kapitan / landslide ka’t dili dili

——-‘——————————‐——————
Panupaya yu pu makanini ya pu ing kwentu ning kapusungan ding aduang miyasawa…
Misan dening miyasawa atyu la babo kama uling matua nala ,apisabi da tang panaun milabas da…. akutang ning babayi king asawa na nung migtaksil ne kaya, sabi na …sabyan mu e na ku man mimwa uling matua tana ngana, O sigi ngana ning lalaki e ka lulungkut ne ? aliku pakibat ning babayi gang kwentu mu ngan … Sinabi ina kumari mu ngana, tambing neng mibua ing babayi , nano i kumaring Rose pa ing pemalit mu kaku ngana…
Balaku sang kwentu ko ngan e ka muwa ngana ning lalaki….
O sigi itamu ne ngana ning babayi tsa ne migcalma … o ita mu ne ngana ning babayi
..awa iya mu ngana ning lalaki kaybat ala na ngana, meging tapat naku keka ngana…. O saugli mu pota galang ika man ngana ning lalaki?
Wa , e ca muwa ngana ning babayi ….gewa cu naman ita uling caluguran daka ngana. Atandanan mu anyang pebagut mo deng ipan mu uling ala katang pera kanita ,mekisabi ku katawan ku namu ing pamayad ku , Aru ! ika man pala ne, o ita namo? Kutang ning lalaki, atin pa ngana ning babayi uling kaluguran daka ngana , atandanan mung anyang mesakit ka pusu ? Kaybat ning operasyun mu ala katang pera kanita . Itang doctor liningun keka .katawan ku yang pemayad ku…O ala na kanyan ngana ning lalaki…,
Atin metung namu ngana.
Atandanan mu anyang minyambut ka keng eleksyun ngana deta ngan migbotu keka ngana…,,
Kabud menabu ya ing lalaki keng kama….. Yari ne pu.

Neng Herman Pablo

Ing naturalesa napun at nacadua
Cayacbe ning dulum ampo ning masala
Sipuac lusuc quing gamat ning maiupaia
Taung lelangan quelub na’t pepabala.

Lingcas a sinibut quing pinac, taldawa
Quinapmung aluntian at pepa sagana
Ding danuman, laug, danau, dagat, sapa
Mamagus quing lugud lamac na’t biyaya

Dening bunduc quing matas na pang pigampa
Inacse ning tau binie municala
Ninung milingus quing linang nang maula?
Nu nala!… tiburan a queia mamingiua?

Ing tau meging sutil quing Dios, milalang.
Ing naturalesa e na acambilan.
Pemutut dening pun alang caingatan.
Ilug, laug, danau dagat a pirquiryan.

Sigi ding taguling dimut dang pamangan
Pidaqueng gabun na dapot a pitamnan
Linibe a gedung, paniulung dang ausan
Ing naturalesa mescup nang cabilian

Nu”la ding masalpitic, magparaluman
Melumpaui queng balang aldo dumalan
Ninung nang milingap mesirang carinan?
Ninung miui…. quing mabubugtu nang leguan.

O naturalesa ninu ing magbante?
Cabiliang Salunan, quecang pangarate
Sesen naca’t lingapan iang manalale.
Aldo’t bengi magpaulaga’t lumaue.

Atin pang macudta lawiwi’t migale?
O artistang abalic sadya mung cule
At talaturu king ulaga mu mapse?
O saserdote quing pulpitu iugne?

Ninu nang maglualu queca ing magbante?
Pangasibul mu ninu nang manantabe?
Keng sadya mung lusuk linang a dalise
Atin pa caiang sundalus… midaun bie?

Naturalesa! burian mung cacu mutus!
Dadaun kung cudta a queca milingus.
Susunis rima quing Dios queia mamaus.
Cabilian mung…., uling iang cabud manatbus!